Shkup, 9 tetor – Në Sofje u zhvillua takimi midis ministrit të punëve të jashtme të Maqedonisë së Veriut, Timço Mucunski dhe ministres së punëve të jashtme të Bullgarisë, Velislava Petrova-Çamova. Në fund të dyja palët vendosën të mbeten në qëndrimet e tyre dhe nuk lëvizin nga pika zero. Duket se ky takim u bë vetëm sa për “sy e faqe” duke i thënë Brukselit se ne po mundohemi të gjejmë zgjidhje, por zgjidhje nuk arrihet. Koha punon në dëm të dy palëve, por kryesisht për Shkupin zyrtar çdo vonesë është zhgënjim shtesë, shkruan “Zhurnal.mk”.
Nuk është zgjidhur asnjë nga çështjet kryesore
Në Sofje nga takimi midis dy kryediplomatëve nuk është arritur asnjë zgjidhje nga çështjet kryesore dhe qëndrimet e dy vendeve mbeten shumë larg. Megjithatë është diskutuar zhvillimi i dialogut midis dy vendeve në periudhën e ardhshme në një frymë pozitive. Ky dialog do të vazhdojë dhe qëndrimi i Maqedonisë së Veriut është absolutisht i qartë, duke e ditur se Bullgaria ka një interes strategjik që Shkupi zyrtar të përparojë në rrugën e saj evropiane.
Megjithatë, Maqedonia e Veriut është vendi që ka pasur më së shumti probleme dypalëshe gjatë viteve dhe sa herë që zgjidhet një çështje dypalëshe, lind një e re. Ky mosbesim ekziston prandaj politikanët në Shkup gjithashtu kërkojnë të jenë të vendosur në qëndrimet e tyre në lidhje me gjuhën, identitetin, historinë dhe kulturën. Këto çështje nuk duhet të rëndojnë rrugën e integrimit evropian prandaj duhet të zgjidhen në mënyrën më të mirë.
Në Sofje, dy kryediplomatët shkëmbyen mendime për planet e veprimit në lidhje me pakicat, për të cilin u ra dakord të diskutohet në periudhën e ardhshme.
Bullgaria është e vetëdijshme dhe e bindur se nuk ka pritje të tjera nga Republika e Maqedonisë së Veriut përveç atyre të dakorduara në vitin 2022. Sofja zyrtare e mbështet perspektivën e integrimit evropian të Maqedonisë së Veriut, por kërkon që kushtet për këtë janë të pandryshuara që nga viti 2022. Kjo nënkupton që duhet të bëhen ndryshimet kushtetuese dhe të zbatohen të gjitha elementët e tjerë të procesit të dakordësuar para katër viteve. Bullgaria kërkon të përmbushen angazhimet e marra dhe kërkon që të dyja palët të mbajnë komunikim të hapur për çështje me interes të ndërsjellë, shkruan “Zhurnal.mk”.
Maqedonia e Veriut kërkon garanci, por askush s’i garanton!
Vendet e tjera të Ballkanit Perëndimor po tregojnë vullnet politik për të përparuar drejt BE-së, por duhet që kjo të ndodhë edhe me Maqedoninë e Veriut.
Maqedonia e Veriut kërkon garanci, por këtë garanci askush nuk ia jep. As Brukseli zyrtar por as Sofja. Është thënë qartë se procesi i pranimit në Bashkimin Evropian përcaktohet nga rregullat dhe kriteret dhe se asnjë shtet anëtar nuk mund të garantojë hapa të ardhshëm në këtë proces.
Asnjë shtet anëtar nuk mund t’i japë garanci asnjë vendi tjetër kandidat për procesin e mëtejshëm të integrimit. Ajo që mund të garantohet është gatishmëria politike për t’iu përmbajtur angazhimeve që ka marrë secili shtet.
Dëshira më e madhe e Maqedonisë së Veriut është që rruga drejt BE-së dhe anëtarësimi i plotë të bazohet në meritë, dhe jo të rëndohet nga historia apo e kaluara.
Maqedonia e Veriut është plotësisht në përputhje me Politikën e Përbashkët të Jashtme dhe të Sigurisë të BE-së se bazuar në përvojën dhe rezultatet e deritanishme, është dëshmuar si një kandidate e shkëlqyer për anëtarësim. Zgjerimi ka qenë gjithmonë një vendim politik i marrë nga shtetet anëtare me konsensus dhe se nevojitet që kjo të ndodhë edhe kësaj radhe, shkruan “Zhurnal.mk”.
Takimi u bë me insistim të Brukselit – por rezultate nuk kishte!
Takimi në Sofje ndërmjet ministres së Jashtme të Bullgarisë, Velislava Petrova dhe homologut nga Maqedonia e Veriut, Timço Mucunski, kishte si qëllim parësor zhbllokimin e rrugës integruese të Shkupit drejt Bashkimit Evropian, por ai u nxit drejtpërdrejt nga Brukseli.
Ky takim dypalësh u zhvillua në margjinat e Konferencës Ndërkombëtare Ministrore për Korridorin VIII, pikërisht pas këshillës dhe insistimit të Presidentes së Komisionit Evropian, Ursula von der Leyen, e cila kërkoi rikthimin e dialogut për të dalë nga ngërçi politik.
Pa dyshim se ky takim shërbeu për t’i treguar Brukselit vullnet të mirë politik. Maqedonia e Veriut dëshironte të demonstronte se po ndjek udhëzimet e evropianëve, ndërsa Shkupi zyrtar ka kërkuar vazhdimisht që BE-ja të jetë ndërmjetësuese në këtë proces. Përtej “bërjes së qejfit” Brukselit, takimi u përball me një realitet të prerë. Pala bullgare e bëri të qartë se nuk do të ketë rishikim apo rinegociim të kushteve evropiane.
Në fund të fundit, takimi ishte një lëvizje e nevojshme taktike për të mbajtur gjallë kanalet diplomatike nën vëzhgimin e BE-së, por pa sjellë ende një kompromis konkret, pasi palët mbeten të palëkundura në pozicionet e tyre, shkruan “Zhurnal.mk”.
