Ndotja e ajrit mbetet një nga kërcënimet më të mëdha për shëndetin e njeriut, duke shkaktuar jo vetëm sëmundje të frymëmarrjes, por edhe probleme kardiovaskulare dhe neurologjike. Sipas një studimi të ri të Universitetit të Kembrixhit, më shumë se 9 milionë jetë mund të shpëtohen çdo vit nëse vendet e botës do të ulnin ndotjen e ajrit në nivelet e rekomanduara nga Organizata Botërore e Shëndetësisë.
Studimi evidenton se grimcat e imëta ndotëse PM2.5 dhe dioksidi i azotit lidhen me një sërë problemesh shëndetësore, përfshirë infarktin, goditjet në tru, sëmundjet e mushkërive dhe demencën. Sipas studiuesve, vetëm ulja e përqendrimit të grimcave PM2.5 në nivelet e rekomanduara mund të parandalonte 9.4 milionë vdekje në vit, ndërsa reduktimi i dioksidit të azotit mund të shmangte ose shtynte edhe 1.1 milionë vdekje të tjera.
Përfitimet e ajrit më të pastër nuk kufizohen vetëm te ulja e vdekshmërisë. Sipas studimit, kjo do të mund të parandalonte çdo vit 2.8 milionë raste të sëmundjes pulmonare obstruktive kronike (SPOK), 1.1 milionë raste të demencës, 7.3 milionë raste të sëmundjeve koronare të zemrës dhe 2.3 milionë goditje në tru.
Gjetjet nënvizojnë rëndësinë e reduktimit të ndotjes së ajrit si një masë thelbësore për mbrojtjen e shëndetit publik dhe parandalimin e miliona sëmundjeve e vdekjeve në nivel global.
