Zëvendësministrja për Evropën dhe Punët e Jashtme, Silda Anagnosti Çepe mori pjesë sot në edicionin e 3-të të Forumit Ndërkombëtar “Gratë, Paqja dhe Siguria”, në Prishtinë, me ftesë të Presidentes së Republikës së Kosovës, Vjosa Osmani.
Në panelin me temë “Paqebërja në shekullin e XXI. Si arrihet?”, zv.ministrja Çepe ndau përvojën e qeverisë shqiptare në promovimin e barazisë gjinore.
Ajo nënvizoi se si mund të kontribuojnë konkretisht institucionet shtetërore për të thyer barrierat strukturore dhe për të forcuar rolin e grave në vendimmarrjen politike e jetën publike, si një aspekt kyç për paqen dhe sigurinë globale.
Ky forum ndërkombëtar bëri bashkë udhëheqës, ekspertë, akademikë, përfaqësues të shoqërisë civile e grupe interesi, për të diskutuar sfidat aktuale globale me të cilat përballet agjenda e Grave, Paqes dhe Sigurisë në këto kohë të pasigurta, duke evidentuar rolin qendror të grave për paqen dhe zhvillimin e një vendi.
