Prishtinë, 5 maj Zhurnal.mk – Abdixhiku thotë se renditja në listë nuk ka rëndësi dhe se bashkëpunimi bazohet në mirëbesim.
Kryetari i Lidhja Demokratike e Kosovës, Lumir Abdixhiku, ka përgënjeshtruar raportimet se Vjosa Osmani ka vendosur kushte paraprake për bashkëpunim politik.
Ai ka theksuar se raporti mes tyre nuk është i bazuar në kushtëzime, por në mirëbesim dhe në nevojën për bashkim.
“Asnjë kusht me Vjosën nuk e kemi pasur. Nuk është relacion kushtëzimesh, është relacion i kuptimit të nevojës së përbashkimit”, ka deklaruar Abdixhiku.
I pyetur nëse Osmani mund të jetë bartëse e listës së LDK-së, ai është shprehur se kjo nuk paraqet problem për të.
“Pa asnjë problem. Renditja në listë nuk ka rëndësi”, tha ai.
Megjithatë, Abdixhiku ka shtuar se Osmanin e sheh si kandidaten më të përshtatshme për postin e presidentit.
“Besoj se Vjosa Osmani duhet të jetë kandidatja e shkëlqyeshme dhe më e duhur për presidente. Populli e dëshiron një gjë të tillë”, ka theksuar ai, duke shtuar se është i gatshëm ta mbështesë një kandidaturë të tillë.
