Prishtinë, 13 maj Zhurnal.mk – Kandidati për kryeministër nga radhët e LDK-së, Lumir Abdixhiku ka bërë të ditur se mëngjesin e sotëm përcolli stërvitjet e KF Prishtinës, klubit që përfaqëson pasionin, përkushtimin dhe ëndrrat e brezave të tërë.
Përmes një postimi në Facebook, i pari i LDK-së tha se sporti e futbolli janë shumë më tepër se lojë.
“Janë disiplinë, karakter, sakrificë e shpirt gare. Janë vendi ku të rinjtë mësojnë të besojnë tek vetja, tek ekipi dhe tek qyteti që përfaqësojnë”, ka shkruar ai.
Megjithatë, sipas Abdixhiku, talenti i të rinjve të Kosovës nuk mjafton pa mbështetje reale.
“Kosovës i duhen më shumë fusha sportive, stadiume funksionale, akademi moderne, kushte dinjitoze për stërvitje dhe më shumë përkrahje institucionale për klubet e sportistët tanë”.
“Sporti e futbolli, janë investime në rininë tonë. Investim në shëndet, edukim, disiplinë dhe krenari qytetare. Kur një i ri hyn në fushë sportive, ai shndërrohet në aset. Kur një klub mbështetet, një qytet merr frymë më ndryshe. E kur sporti ngritet, ngrihet edhe vetë shoqëria jonë”, ka shkruar ai.
