Shkup, 27 tetor, Zhurnal.mk – Në periudhën nga 19 deri më 26 tetor, Komuna e Karposhit dhe Qyteti i Shkupit zhvilluan një aksion të përforcuar të përbashkët inspektues në të gjithë territorin e komunës, me qëllim vendosjen e rendit komunal dhe përmirësimin e higjienës në sipërfaqet publike.
Terreni u nda në pesë rajone, të cilat u kontrolluan në dy ndërrime nga 45 inspektorë dhe redarë komunalë, ndërsa në aksion u angazhuan edhe zyrtarë policorë të uniformuar nga Stacioni Policor Karposh.
Aksioni përfundoi me kontroll të plotë të territorit të Bardovcit dhe Zllokuqanit, ku krahas pastrimit të deponive të egra u shqiptuan edhe një numër i madh urdhërpagesash kundërvajtëse.
Në kuadër të mbikëqyrjes njëjavore, shërbimet inspektuese konstatuan një numër të madh parregullsish:
- Inspektorët komunalë: Kryen 192 kontrolle, nxorën 19 vendime për eliminimin e mangësive, shqiptuan 34 vërejtje, 42 gjoba për persona fizikë dhe 27 gjoba për persona juridikë.
- Redarët komunalë: Realizuan 231 kontrolle dhe shqiptuan gjithsej 134 gjoba.
- Inspektorati i Mjedisit Jetësor: Zhvilloi 90 kontrolle, dërgoi 15 ftesa për palët, nxori 17 vendime, 32 vërejtje për selektimin e mbeturinave dhe shqiptoi një gjobë.
- Inspektorati i Trafikut: Kreu 80 kontrolle, lëshoi pesë vendime dhe konfiskoi pesë leje qarkullimi.
- Shërbimet e tjera: Inspektorati i Ndërtimit realizoi 29 kontrolle dhe 15 vërejtje gojore, inspektorati i turizmit shqiptoi shtatë gjoba nga 15 kontrolle të zhvilluara, ndërsa inspektorati i sportit shqiptoi katër gjoba pas 21 kontrolleve të kryera.
Komuna e Karposhit dhe Qyteti i Shkupit njoftuan se kontrollet e përforcuara do të vazhdojnë edhe në periudhën e ardhshme, me theks të veçantë në bashkësinë urbane të Zllokuqanit, duke u bërë thirrje të gjithë qytetarëve dhe subjekteve juridike që mbeturinat t’i hedhin në mënyrë të rregullt dhe t’i respektojnë detyrimet ligjore.
