Manastir, 7 maj Zhurnal.mk – Një nxënës i klasës së shtatë, në rrjetin social TikTok, ka publikuar një listë me emrat dhe mbiemrat e bashkënxënësve të tij, duke i kërcënuar se do t’i likuidojë. Në postim ishte shënuar edhe data e saktë e planifikuar për këtë veprim.
Drejtori i shkollës fillore “Stiv Naumov” nga Manastiri, në një bisedë për 4news.mk, thotë se është mbajtur mbledhje me prindërit dhe se janë njoftuar Ministria e Punëve të Brendshme dhe Qendra për Punë Sociale. Ai konfirmon se incidenti ka ndodhur jashtë ambienteve të shkollës.
”Në kuadër të kompetencave tona, shkolla ka ndërmarrë masat e duhura për mbrojtjen dhe mbështetjen e nxënësve, si dhe aktivitete për qetësimin e situatës dhe sigurimin e një mjedisi të sigurt për të gjithë nxënësit dhe punonjësit.
I bëjmë thirrje publikut të përmbahet nga përhapja e informacioneve të paverifikuara dhe të respektojë privatësinë dhe dinjitetin e të gjithë personave të përfshirë, veçanërisht duke pasur parasysh se bëhet fjalë për të mitur. Siguria dhe mirëqenia e nxënësve mbetet prioriteti ynë më i lartë dhe shkolla do të vazhdojë të bashkëpunojë me institucionet kompetente deri në zbardhjen e plotë të rastit”, theksoi drejtori Nikole Piskaçev.
Edhe pse përmbajtjet nuk janë publikuar brenda shkollës dhe as gjatë procesit mësimor, pas ankesës së marrë nga një grup prindërish, shkolla njoftoi pa vonesë institucionet përkatëse – MPB-në, Qendrën për Punë Sociale dhe Departamentin e Arsimit në Komunën e Manastirit, me qëllim që rasti të hulumtohet plotësisht dhe të procedohet më tej në mënyrë institucionale.
Prindërit e nxënësit që bëri postimin kanë njoftuar se do ta ndërrojnë shkollën e fëmijës së tyre.
Ky rast ka shkaktuar shqetësim të madh, duke kujtuar ngjarjen e tre viteve më parë në Beograd, ku 13-vjeçari Kosta K., me një listë në dorë, hyri në shkollë dhe vrarë një numër të madh të moshatarëve të tij dhe rojën e shkollës.
