Tiranë, 5 maj, Zhurnal.mk – Presidenti i Republikës, Bajram Begaj reagoi sot pas miratimit të raportit për Shqipërinë nga Komiteti për Punët e Jashtme në Parlamentin Europian.
Begaj theksoi se miratimi i këtij raporti është një vlerësim për reformat e ndërmarra për përparimin e vendit në rrugën drejt anëtarësimit në Bashkimin Evropian.
“Shqipëria është e vendosur dhe e përkushtuar në rrugën e saj evropiane për arritjen e objektivit strategjik, anëtarësimit të plotë në Bashkimin Evropian”, nënvizoi Begaj.
Komiteti për Punët e Jashtme në Parlamentin Europian miratoi sot raportin e iniciuar nga raportuesi Andreas Schieder (S&D, Austri) me 58 vota pro, 7 kundër dhe 7 abstenime.
Eurodeputetët në Komitetin për Punët e Jashtme përshëndesin në raport angazhimin e jashtëzakonshëm të Shqipërisë për integrimin në BE dhe progresin e shpejtë që ka bërë në vitet e fundit, duke u bërë thirrje autoriteteve të sigurojnë që legjislacioni i miratuar të zbatohet plotësisht.
