Shkup, 05 tetor, Zhurnal.mk – Një delegacion i Ministrisë së Energjisë, Minierave dhe Burimeve Minerale (MERSM) mori pjesë në Javën e Energjisë së Qëndrueshme të Komisionit Ekonomik të Kombeve të Bashkuara për Evropën (UNECE), e cila u zhvillua në Pallatin e Kombeve në Gjenevë.
Sipas njoftimit të ministrisë, gjatë këtij aktiviteti ndërkombëtar u diskutuan temat kyçe që lidhen me tranzicionin energjetik, sigurinë energjetike, qasjen në energji dhe zhvillimin e qëndrueshëm.
Ministria bëri të ditur se 58 për qind e kapacitetit të instaluar energjetik në vend vjen nga burimet e ripërtëritshme të energjisë, duke e cilësuar këtë si një arritje të rëndësishme në procesin e transformimit të sektorit energjetik.
Siç raporton Tetovasot, përfaqësuesit e ministrisë theksuan se prioriteti i radhës është modernizimi i rrjetit energjetik dhe investimi në sistemet për magazinimin e energjisë, të cilat konsiderohen thelbësore për integrimin më efikas të burimeve të ripërtëritshme dhe rritjen e sigurisë së furnizimit.
Pjesëmarrja në këtë forum ndërkombëtar shërbeu gjithashtu për shkëmbimin e përvojave me përfaqësues të vendeve të tjera dhe organizatave ndërkombëtare mbi politikat dhe praktikat më të mira në fushën e energjisë së qëndrueshme, raporton Tetovasot.
