Kryeqyteti indian Delhi të mërkurën është kthyer në një “qendër zgjedhore” të pazakontë, ku votuesit nuk po zgjedhin politikanët e tyre, por qenin më të shëndoshë të qytetit.
Konkursi “Fat Dogs of Delhi”, i frymëzuar nga gara amerikane “Fat Bear Week” në Alaska, ka pushtuar Instagramin dhe ka mbledhur rreth 100 mijë ndjekës.
Gara nisi më 24 shtator me 64 qen, ndërsa tani ka mbërritur në fazën finale. Për të preferuarit janë zhvilluar fushata, janë publikuar postera dhe madje kanë nisur edhe akuza për promovim të paguar.
Organizatorët, përmes llogarisë @fatdogsofdelhi, kanë bërë të ditur se votimi do të zhvillohet edhe fizikisht të mërkurën.
Mediat indiane e kanë trajtuar garën me të njëjtin humor. Hindustan Times e quajti atë “zgjedhjet e peshave të rënda të Delhit”, ndërsa The Print shkroi për “politikën serioze të putrave”.
Por gara mori një kthesë të papritur kur favoriti kryesor, Gola, një qen ngjyrë kafe dhe mjaft i rrumbullakët, u raportua se kishte ngordhur.
Pavarësisht kësaj, Gola, i njohur edhe me nofkën “Kebab”, mbeti në garë dhe tani përballet në finalen e fundit me Googoo, një qen i madh me ngjyrë kafe dhe të bardhë.
Organizatorët, të cilët kanë zgjedhur të mbeten anonimë, thanë se u habitën nga rritja e madhe e ndjekësve në rrjetet sociale që prej nisjes së konkursit.
Në faqen e garës janë publikuar edhe video të qenve duke marrë përkëdhelje në bark, ndërsa organizatorët kanë shpërndarë informacione për organizata që punojnë për mbrojtjen e kafshëve dhe për t’u siguruar qenve endacakë një jetë dinjitoze.
Delhi ka dhjetëra mijëra qen endacakë. Në shumë lagje të klasës së mesme, ata janë bërë pjesë e komunitetit dhe banorët kujdesen për ta. Gjatë dimrit, disa prej tyre madje vishen me xhaketa për t’u mbrojtur nga temperaturat e ulëta.
Por përtej humorit të konkursit, problemi i qenve endacakë në Delhi është shumë serioz. Mediat raportojnë rregullisht raste sulmesh, ndërsa situata është përkeqësuar nga programet e pamjaftueshme të sterilizimit dhe kufizimet ligjore për eliminimin e tyre.
Vitin e kaluar, Gjykata Supreme e Indisë urdhëroi mbledhjen masive të qenve endacakë, por më pas e kufizoi operacionin pasi u ngritën pikëpyetje për mundësinë e zbatimit të një aksioni kaq të gjerë.
Ndërkohë, konkursi për qenin më të shëndoshë zhvillohet në një moment kur India po përballet edhe me debate shumë më serioze rreth politikës zgjedhore.
Komisioni Zgjedhor i Indisë, institucioni kushtetues që mbikëqyr zgjedhjet në demokracinë më të madhe në botë, është përballur me kritika pas një hetimi gazetaresk që ngriti dyshime për parregullsi gjatë një procesi të gjerë të rishikimit të listave të votuesve.
Komisioni i ka mohuar akuzat, duke deklaruar se vendimet e tij janë marrë në mënyrë unanime dhe në përputhje me ligjin.
