Shkup, 16 korrik, Zhurnal.mk – Kryetari i Degës së BDI-së në Strugë, Faton Pollozhani, i ka bërë thirrje publike kryetarit të Komunës së Strugës, Mendi Qyra, që të ndalë, siç thotë ai, “propagandën, manipulimet dhe dezinformatat” lidhur me projektin për menaxhimin e qenve endacakë.
Përmes një reagimi publik, Pollozhani e fton Qyrën të organizojë një seancë publike të Këshillit Komunal, ku të marrin pjesë përfaqësues të Agjencisë së Ushqimit dhe Veterinarisë, shoqatat për mbrojtjen e kafshëve, si dhe ekspertë të fushës, me qëllim që debati të zhvillohet mbi baza profesionale dhe ligjore.
Sipas Pollozhanit, në seancën e fundit të Këshillit është pranuar se studimi i fizibilitetit për projektin përmban mangësi dhe gabime, ndërsa, sipas tij, nuk janë respektuar as procedurat ligjore për inicimin dhe shpalljen e Partneritetit Publiko-Privat.
Ai ngre gjithashtu pyetjen se përse po kërkohet miratimi i një studimi të tillë nga Këshilli Komunal, duke theksuar se bëhet fjalë për një projekt me vlerë prej 1.500.000 eurosh, që parasheh shpenzimin e mjeteve publike.
Në fund të reagimit, Pollozhani shprehet se pret caktimin e një date për mbajtjen e debatit publik, duke vlerësuar se një proces transparent dhe i mbështetur në ekspertizë është në interes të qytetarëve dhe të vendimmarrjes së përgjegjshme.
