FMN: Rritja ekonomike në Maqedoninë e Veriut do të ngadalësohet, inflacioni në rritje për shkak të luftës në Lindjen e Mesme

Shkup, 2 prill, Zhurnal.mk – “Goditja nga rritja e çmimeve të energjisë si pasojë e luftës në Lindjen e Mesme pritet të ndikojë negativisht në rritjen ekonomike dhe të rrisë presionet inflacioniste në Maqedoninë e Veriut”, njofton Fondi Monetar Ndërkombëtar.

“Sipas projeksioneve, rritja reale e BPV-së pritet të ngadalësohet në 3.1 për qind në vitin 2026 dhe gradualisht të stabilizohet rreth potencialit prej 3 për qind në afat të mesëm. Në të njëjtën kohë, çmimet më të larta globale të naftës pritet të rrisin inflacionin në rreth 4.5 për qind në vitin 2026, duke shtuar shqetësimet për përballueshmërinë e energjisë,” thuhet në komunikatën e FMN-së pas gjetjeve paraprake, transmeton Zhurnal.mk.

FMN rikujton masat e fundit të ndërmarra nga qeveria në Shkup për të zbutur ndikimin, përfshirë uljen e TVSH-së për karburantet nga 18 në 10 për qind dhe lirimin e mazutit nga rezervat shtetërore për të mbajtur nën kontroll kostot e prodhimit të energjisë elektrike.

Sipas FMN-së, për shkak të rritjes së importeve të energjisë, deficiti i llogarisë korrente pritet të zgjerohet në rreth 5 për qind të BPV-së në vitin 2026, përpara se të ulet gradualisht në rreth 3 për qind në afat të mesëm, me stabilizimin e tregjeve globale të mallrave.

“Rreziqet për perspektivën janë të orientuara nga ana negative. Një konflikt i zgjatur në Lindjen e Mesme dhe çmime më të larta të energjisë, të kombinuara me rritje më të dobët në BE, mund të ngadalësojnë më tej aktivitetin ekonomik, të mbajnë inflacionin të lartë për më gjatë, të dobësojnë pozicionin e jashtëm dhe të vonojnë konsolidimin fiskal,” paralajmëron FMN.

Institucioni gjithashtu paralajmëron se në planin e brendshëm, devijimet fiskale – veçanërisht nga rritjet e shpeshta dhe të paplanifikuara të pagave dhe pensioneve, si dhe tejkalimet e kostove në projektet e mëdha infrastrukturore – mund të rrezikojnë konsolidimin fiskal dhe të ulin besimin e tregjeve.

“Në anën pozitive, zbatimi më i fuqishëm i reformave mund të përmirësojë ndjeshëm perspektivat e rritjes ekonomike të Maqedonisë së Veriut,” përfundon FMN.