Tiranë, 6 maj, Zhurnal.mk – Fotografi palestinez Saher Alghorra është vlerësuar me çmimin prestigjioz “Pulitzer Prize 2026” në kategorinë “Breaking News Photography”, për dokumentimin e krizës humanitare në Gaza.
Alghorra, bashkëpunëtor i gazetës The New York Times, u vlerësua për një seri fotografish që administratorja e Pulitzer-it, Marjorie Miller, i përshkroi si “tronditëse” dhe “të ndjeshme”.
Fotografitë pasqyrojnë shkatërrimin, urinë dhe vuajtjet e civilëve në Gaza gjatë luftës që prej tetorit 2023. Miller theksoi gjithashtu rëndësinë e gazetarisë së pavarur në një kohë kur gazetarët përballen me pengesa dhe sfida në rritje.
Përveç Pulitzer-it, Alghorra kishte fituar edhe çmimin e parë për fotografi lufte në edicionin e 32-të të “Prix Bayeux Calvados-Normandie” në Francë, me reportazhin “Trapped in Gaza: Between Fire and Famine”, kushtuar jetës së civilëve palestinezë nën rrethim dhe bombardime.
