Shkup, 19 korrik, Zhurnal.mk – Billbordi i vendosur në hyrje të Shkupit, përmes të cilit kryetari i Qytetit të Shkupit, Orce Gjorgjievski, u uronte mirëseardhje vizitorëve, është larguar vetëm një ditë pas vendosjes së tij.
Heqja e billbordit vjen pas reagimeve të shumta në rrjetet sociale, ku qytetarë, organizata dhe përfaqësues politikë kritikuan mënyrën e realizimit dhe përmbajtjen e tij.
Sipas komenteve të publikuara, në përgatitjen e billbordit dyshohet se është përdorur inteligjenca artificiale, ndërsa u ngritën vërejtje se një pjesë e objekteve ishin paraqitur në mënyrë joreale dhe se ishin bërë gabime në paraqitjen e simboleve të njohura të kryeqytetit.
Kritika pati edhe për mospërfshirjen e objekteve të tjera fetare dhe kulturore, veçanërisht të Çarshisë së Vjetër të Shkupit, si dhe për mungesën e gjuhës shqipe në mbishkrimin e vendosur në hyrje të qytetit.
Me reagime publike dolën edhe këshilltarët shqiptarë në Këshillin e Qytetit të Shkupit, të cilët kërkuan respektimin e karakterit multietnik të kryeqytetit, ndërsa kritikave iu bashkua edhe partia “E Majta”.
Qytetarët njoftuan gjatë ditës së sotme se billbordi tashmë ishte larguar nga vendi ku ishte vendosur.
