Shkup, 14 shkurt – Fushata për trajtimin e tetëvjeçares Ana Jovançeva është mbyllur zyrtarisht, pasi për vetëm gjashtë orë u mblodhën 3,1 milionë denarë, njoftoi doktori Nenad Lazarov.
Bëhet fjalë për një nga aksionet humanitare më të shpejta dhe më masive në periudhën e fundit, me çka janë siguruar plotësisht mjetet e nevojshme për ndërhyrjen kirurgjikale dhe trajtimin jashtë vendit. Me këtë, siç theksoi Lazarov, familja e Anës është të paktën financiarisht e lehtësuar në periudhën më të vështirë të jetës së tyre.
Ana është diagnostikuar me një tumor të rrallë dhe jashtëzakonisht agresiv në sinuse – Tu Foss pterygopalatina, Sinus sphenodalis lat dex et orbitae lat dex, me përfshirje të orbitës. Diagnoza është konfirmuar në Kroaci, ku po kërkohet një kirurg i specializuar për kryerjen e operacionit kompleks dhe delikat.
Sëmundja është serioze dhe me rrezik të lartë, ndërsa koha ishte faktor kyç, për këtë arsye fushata u cilësua si më urgjentja deri më tani. Reagimi masiv i qytetarëve brenda pak orësh tregoi solidaritet dhe bashkim të madh kur bëhet fjalë për jetën e një fëmije.
“Të dëshirojmë çdo të mirë, Ana. E gjithë shteti u ngrit për ty”, porositi Lazarov, duke shtuar se mbështetja për vajzën dhe prindërit e saj do të vazhdojë edhe në periudhën e ardhshme.
