Shkup, 6 tetor, Zhurnal.mk – Që pas 16 shtatorit është thënë shpesh se situata nuk do të jetë më e njëjtë dhe kështu po ndodh. Katër ish-krerët e UÇK-së u dënuan me gjithsej 81 vite burg, duke hapur një kapitull të ri të tensioneve politike e shoqërore. Prej asaj dite, qytetarët e Kosovës ditë e natë kanë qëndruar në rrugë për ta kundërshtuar vendimin. Protesta ka pasur jo vetëm në Prishtinë, por edhe në Shkup, Tiranë e shumë qytete evropiane, duke e shndërruar këtë çështje në një kauzë mbarëkombëtare, shkruan Zhurnal.
Çfarë ndodhi mbrëmë pranë Kuvendit e Qeverisë?
Sheshet e Prishtinës u përfshinë nga tensione të forta mes protestuesve dhe Policisë. Në rrugët pranë institucioneve u hodh gaz lotsjellës, mjete piroteknike dhe u ndezën zjarre, duke krijuar një atmosferë të rënduar e të pasigurt.
Protesta para Kuvendit dhe Qeverisë u përshkallëzua në orët e mbrëmjes, pasi dështoi përpjekja për marrëveshje rreth ndryshimeve në Ligjin për Dhomat e Specializuara. Kryeministri Albin Kurti kërkoi një marrëveshje paraprake me kreun e PDK-së, Bedri Hamza, për çështjen e presidentit si kusht për votimin e ligjit në lexim të dytë. Pas dështimit të marrëveshjes, deputetët e Vetëvendosjes u larguan nga Kuvendi pa votim përfundimtar.
Situata u tensionua jashtë ndërtesës, ku veteranë të UÇK-së dhe qytetarë vazhduan protestën duke kërkuar miratimin e plotë të ndryshimeve ligjore. Policia ndërhyri për shpërndarjen e turmës dhe krijimin e korridoreve të sigurisë për largimin e zyrtarëve e deputetëve. Në sheshin “Skënderbeu” u përdor gaz lotsjellës dhe ujë me presion, ndërsa protestuesit hodhën fishekzjarrë drejt kordonëve policorë.
Pamjet e publikuara treguan edhe përdorim force nga Policia ndaj qytetarëve, me ndalime e shoqërime të protestuesve. Megjithatë, një numër i madh protestuesish vazhduan të qëndrojnë në qendër të kryeqytetit, duke bllokuar sheshin dhe rrugët për kalimtarët tjerë.
Ku mund të shpie kjo situatë e trazuar?
Kosova ka hyrë në një fazë të re tensioni politik e shoqëror. Braktisja e ligjit të Speciales nga Kurti dhe mungesa e konsensusit parlamentar e kanë shtuar pasigurinë institucionale. Nëse Kuvendi nuk arrin të miratojë ndryshimet ligjore dhe të zgjedhë presidentin brenda afatit kushtetues, vendi mund të përballet me një krizë të dyfishtë juridike dhe politike.
Protestat e vazhdueshme, të shoqëruara me përplasje, mund të shndërrohen në një formë presioni të fortë ndaj institucioneve vendore dhe ndërkombëtare. Kjo situatë rrezikon të instrumentalizohet nga aktorë të jashtëm, duke e bërë Kosovën një vatër të re destabilizimi në rajon.
Nëse tensionet nuk menaxhohen me dialog dhe vendime të matur, Kosova mund të përballet me izolim politik dhe me dobësim të pozitës së saj ndërkombëtare. Kjo do të ishte një goditje e rëndë për një vend që ende po lufton për konsolidimin e shtetësisë dhe për integrimin euroatlantik.
Kujtojmë që, Kosova e pas vendimit të Hagës është një realitet i trazuar, ku tymi i protestave dhe telasheve politike po errëson horizontin e stabilitetit. Nëse nuk gjendet një zgjidhje e shpejtë dhe e drejtë, vendi rrezikon të hyjë në një spirale krizash që do të kenë pasoja jo vetëm për Kosovën, por për gjithë rajonin. /Zhurnal.mk
