Shkup, 27 gusht, Zhurnal.mk – Agjencia për Ushqim dhe Veterinari ka konfirmuar praninë e virusit të Nilit Perëndimor tek një korb i ngordhur në Resnjë. Ministri i Shëndetësisë, Sasho Klekovski, konsideron se shpendi i ngordhur është dëshmi për qarkullim lokal të virusit.
“Agjencia për Ushqim dhe Veterinari gjithashtu e konfirmoi korbin e ngordhur me virusin e etheve të Nilit Perëndimor në Resnjë, në zonën qendrore në parkun pranë komunës. Korbi është përgjithësisht shpend stacionar, pra nuk është shpend shtegtar dhe gjetja e korbit të ngordhur është tregues i qarkullimit lokal të virusit të etheve të Nilit Perëndimor”, tha ministri Klekovski.
Për korbin e ngordhur të infektuar me virusin, Klekovski tha se menjëherë e kanë njoftuar Qendrën për Shëndet Publik në Manastir dhe kryetarin e Komunës së Resnjës. Ai pret që ata të bëjnë rishikim të planeve për spërkatje kundër mushkonjave dhe të fillojnë spërkatjen sipas indikacioneve.
Në faqen e internetit healthalert.mk, ku ministri Klekovski dje tha se vazhdimisht do të publikohen të dhëna për të infektuarit me virusin, qëndron se ende nuk është regjistruar i infektuar nga Resnja.
Korbi në Resnjë është shpendi i dytë i ngordhur me virus të konfirmuar. Korbi i parë i ngordhur u gjet në zonën qendrore në Shkup, pranë Vardarit.
Agjencia për Ushqim dhe Veterinari njoftoi se ka intensifikuar aktivitetet në terren për përcaktimin e gjendjes epidemiologjike me sëmundjen e etheve të Nilit Perëndimor tek shpendët, me testim laboratorik të mostrave të marra nga shpendët. Mbikëqyrja aktive do të zhvillohet në të gjithë territorin e shtetit dhe me të do të përfshihen shpendë nga llojet pula, gjela, patat, fazanët, derra të egër, thëllëza, strucat, si dhe shpendë të egër nga llojet rosat, patat, mjellmat, lejlekët, çafkat, skifterët, pulëbardhat, sorrat, bufat, karabullakët, shqiponjat dhe të tjerë.
