Prishtinë, 19 qershor, Zhurnal.mk – Këshilli Prokurorial i Kosovës (KPK) ka konfirmuar me gjashtë vota për dhe një kundër listën e kandidatëve që kanë aplikuar për pozitën e Kryeprokurorit të Shtetit, raporton Ekonomia Online.
Kryesuesi i KPK-së, Arian Gashi, tha se lista e kandidatëve është miratuar pas shqyrtimit të aplikimeve të pranuara në konkursin që u mbyll më 10 qershor.
“Me gjashtë vota për dhe një kundër u konfirmua lista e kandidatëve për pozitën e Kryeprokurorit të Shtetit”, tha Gashi.
Pesë prokurorë janë konfirmuar si kandidatë për këtë pozitë.
Sipas renditjes, për Kryeprokuror të Shtetit kanë aplikuar:
Atdhe Dema – Prokuror në Departamentin për Hetimin e Terrorizmit në Prokurorinë Speciale të Republikës së Kosovës;
Naim Abazi – Prokuror në Departamentin për Hetimin e Korrupsionit dhe Krimit Financiar në Prokurorinë Speciale të Republikës së Kosovës;
Rafet Halimi – Prokuror në Departamentin për Hetimin e Korrupsionit dhe Krimit Financiar në Prokurorinë Speciale të Republikës së Kosovës;
Shqipdon Fazliu – Prokuror në Zyrën e Kryeprokurorit të Shtetit;
Zejnullah Gashi – Kryeprokuror i Prokurorisë Themelore në Prishtinë.
