Zagreb, 24 Mars, Zhurnal.mk – Kryetari i Kroacisë Zoran Milanoviç sot ka shprehur solidaritetin e tij ndaj autoriteteve të Maqedonisë së Veriut dhe vendit përballë kushtëzimit bullgar, e të pranuar edhe nga qeveritë e 26 vendeve të tjera të BE-së, për ndryshim kushtetute për të nisur bisedimet e anëtarësimit me bllokun Evropian.
Milanovic, në një konferencë për shtyp pas takimit me homologen maqedonase Gordana Siljanovska-Davkova, ka shprehur revoltën e tij ndaj kushtëzimit të vënë katër vite më parë ndaj vendit.
Ai tha se në situatën e krijuar Maqedonia e Veriut vendos vetvetiu nëse anëtarësimi në BE është diçka që do të duhet bërë me çdo kusht apo jo.
“Maqedonia e Veriut do të vendosë vetë për fatin e saj dhe ka mundësinë të vendosë se çfarë është e rëndësishme për të. A është anëtarësimi në BE me çdo kusht, sepse ajo që po i kërkohet Maqedonisë së Veriut kohët e fundit është një lloj oferte që nuk është e lehtë për t’u përmbushur – çfarëdo që të bësh, vjen një kërkesë e re, diçka që as nuk e ke llogaritur,” tha ai në konferencë, sipas një komunikate nga zyra e tij.
“Maqedonia e Veriut vendos vetë se çfarë është më mirë për të dhe cilën rrugë zgjedh. Sigurisht që është rruga e sigurisë, kënaqësisë, mirëqenies, paqes dhe qetësisë së qytetarëve, dhe kjo e fundit, përfshirë BE-në, është një fasadë. I uroj gjithë të mirat Maqedonisë, maqedonasve dhe politikanëve në Maqedoninë e Veriut dhe që ata të gjykojnë vetë – pa mentorimin e dikujt tjetër dhe pa manipulimin dhe menaxhimin e dikujt tjetër – çfarë është e mirë për ta,” tha Milanoviç.
Kryetari i Kroacisë, madje tha se jetë ka edhe pa anëtarësim në BE.
Ka jetë edhe pa BE-në, dhe një jetë të suksesshme dhe plotësisht dinjitoze”, tha Zoran Milanoviç.
