Shkup, 27 Prill, Zhurnal.mk – Partia opositare maqedonase LSDM sot e ka përkujtuar sulmin e përgjakshëm të nacionalistëve maqedonas ndaj anëtarëve të LSDM-së dhe deputetëve shqiptarë para nëntë viteve brenda ndërtesës së kuvendit.
“27 prilli është një kujtesë e ashpër dhe e përgjakshme se sa lehtë një qeveri kriminale dhe jodemokratike mund ta shtyjë një vend në humnerë. 9 vjet që nga 27 Prilli i përgjakshëm, dita më e zezë në historinë e demokracisë maqedonase,” tha një konferencë për shtyp zëdhënësja e LSDM-së Bogdanka Kuzeska.
“Ishte një përpjekje e organizuar për grusht shteti, e drejtuar nga VMRO dhe Nikola Gruevski. Banditët hynë në Parlament me një qëllim të qartë – të vrisnin deputetë, të lëndonin gazetarë dhe punonjës të parlamentit dhe të përmbysnin rendin kushtetues. Imazhet e asaj dite janë të skalitura edhe pas 9 vitesh: fytyra të përgjakura deputetësh, koka të shpuara, sulme me shufra dhe karrige, zvarritje, tërbim dhe shkatërrim në tempullin e demokracisë. Dhe Kryeministri i sotëm, Hristijan Mickoski, ishte para Parlamentit atë ditë,” shtoi ajo.
Sulmi atë ditë ndodhi pasi që kryetar i kuvendit u zgjodhë Talat Xhaferi i BDI-së.
Më së shumti lëndime atë ditë nga sulmi i rreth 200 personave e të organizuar nga shoqata ‘Për Maqedoni të Bashkuar”, e afërt me VMRO-DPMNE, pësoi kreu i ASH-së Ziadin Sela, i cili u dërgua në spital disa ditë për shërim.
Zëdhënësja e LSDM e akuzoi partinë maqedonase të udhëhequr nga Hristijan Mickoski se po tenton që t’i rehabilirojë sulmuesit e asaj dite.
“Nëntë vjet më vonë, në vend të drejtësisë së plotë, po dëshmojmë përpjekje për rehabilitim të turpshëm të autorëve të krimeve. Pasi VMRO-OKG erdhi në pushtet, personat e dënuar u liruan nga burgu më 27 prill me vetëm një nënshkrim,” tha Kuzeska.
“Sot, i njëjti ekip. E njëjta bandë. E njëjta matricë kriminale. Të njëjtët njerëz, të njëjtat metoda, e njëjta axhendë. Sot, nën udhëheqjen e Hristijan Mickoskit, Maqedonia po shtyhet përsëri drejt një shteti të robëruar,” tha ajo.
Kuzeska akuzoi Mickoskin the partinë e tij për kontroll të gjyqtarëve e prokurorëve, rrëmbim të institutcioneve e mediave, rehabilitim të keqpërdoruesëve e për linçim dhe sulme publike ndaj opozitës.
“Asgjë nuk ka ndryshuar në VMRO-OKG. Kjo është e njëjta strukturë që dëshiron të shkelë përsëri lirinë dhe demokracinë, të merret me disidentët dhe të përhapë urrejtje dhe përçarje midis qytetarëve. 27 Prilli nuk është vetëm një kujtesë – është një paralajmërim. Një paralajmërim për atë që ndodhë kur shteti pushtohet,” tha zëdhënësja e LSDM-së.
