Shkup, 30 janar – Zëvendëskryetari i Bashkësisë së Njësive të Vetëqeverisjes Lokale të Republikës së Maqedonisë së Veriut, Izet Mexhiti, mori pjesë sot në seancën e dytë të Bordit Drejtues të BNJVL-së.
Në kuadër të takimit, së bashku me ministrin e Administratës Publike, Goran Minçev, u prezantua softueri i ri për menaxhimin e burimeve njerëzore, i cili synon të përmirësojë efikasitetin dhe modernizimin e administratës, si në nivel qendror ashtu edhe në njësitë e vetëqeverisjes lokale dhe institucionet e tyre.
Gjatë seancës, u emëruan përfaqësuesit e BNJVL-së në trupa punuese dhe organizata vendore e ndërkombëtare, përfshirë Këshillin e Evropës, NALAS dhe ARLEM, ku do të përfaqësohen interesat e pushtetit lokal. Po ashtu, u paralajmërua se në periudhën në vijim do të kompletohet përbërja e komisioneve brenda BNJVL-së me përfaqësues nga fusha të ndryshme me rëndësi për komunat.
Në këtë takim u shqyrtuan dhe u përkrahën disa iniciativa me rëndësi të veçantë, ndër to iniciativa qytetare “Stop për USJE”, si dhe çështjet e ngritura nga ADKOM në lidhje me sfidat me të cilat përballen ndërmarrjet publike komunale.
Mexhiti theksoi se angazhimi i tij mbetet i palëkundur në drejtim të forcimit të pushtetit lokal dhe mbrojtjes së interesave të komunave dhe qytetarëve.
https://www.facebook.com/share/p/1GHCW9VeZ9/
