Moska konfirmoi sot se një raund i ri negociatash për t’i dhënë fund luftës në Ukrainë do të nisë javën e ardhshme.
”Takimi do të zhvillohet në Gjenevë më 17-18 shkurt dhe do të përfshijë sërish Rusinë, Ukrainën dhe Shtetet e Bashkuara të Amerikës”, bëri të ditur zëdhënësi i Kremlinit, Dmitry Peskov, për agjencinë shtetërore ruse TASS.
Peskov njoftoi se Rusia do të ndryshojë përbërjen e ekipit të saj negociator.
Delegacioni këtë herë do të drejtohet nga ish-ministri i Kulturës dhe këshilltari i presidentit, Vladimir Medinsky, i cili mori pjesë në bisedimet direkte me Ukrainën në Stamboll vitin e kaluar, si edhe në negociatat e zhvilluara pak pas nisjes së luftës.
”Nga ana tjetër, Ukraina ka nisur tashmë përgatitjet për takimin”, shkroi në Telegram sekretari i Këshillit të Sigurisë Kombëtare dhe ish-kryenegociatori, Rustem Umerov.
Ai theksoi se presidenti ukrainas, Volodymyr Zelensky, ka përcaktuar përbërjen e delegacionit negociator.
Përveç Umerovit, në ekipin e Kievit bëjnë pjesë, si më parë, shefi i administratës presidenciale Kyrylo Budanov, shefi i Shtabit të Përgjithshëm Yuriy Hnatov, kreu i partisë presidenciale në parlament David Arakhamia, zëvendësministri i Jashtëm Sergiy Kyslytsya si dhe zëvendësshefi i inteligjencës ushtarake, gjenerallejtënant Vadym Skibitskyi.
Moska dhe Kievi negociuan për herë të fundit drejtpërdrejt në Emiratet e Bashkuara Arabe në fillim të shkurtit.
Ashtu si në raundin e parë në janar, Shtetet e Bashkuara ishin të pranishme si ndërmjetëse.
Pas atyre bisedimeve nuk u shpallën rezultate konkrete, por palët i cilësuan takimet si konstruktive.
Bisedimet në Abu Dabi u drejtuan nga pala ruse nga Igor Kostyukov, kreu i shërbimit të inteligjencës ushtarake GRU.
