Filadefia, 6 gusht, Zhurnal.mk – Koka e një rakete “Falcon 9” të kompanisë amerikane “SpaceX” është përplasur me sipërfaqen e Hënës, në një impakt të pakontrolluar që ndodhi pasi mjeti kishte kaluar më shumë se një vit duke lëvizur në hapësirë.
Raketa ishte përdorur në janar të vitit 2025 për të dërguar drejt Hënës dy misione private, modulin “Blue Ghost” të kompanisë “Firefly Aerospace” dhe “Hakuto-R” të kompanisë japoneze ”Ispace”.
Pas përfundimit të misionit, koka mbeti në një orbitë të paqëndrueshme, derisa graviteti i Hënës e tërhoqi drejt përplasjes.
Sipas NASA-s dhe astronomëve që ndoqën trajektoren e saj, përplasja ndodhi dje.
Ajo krijoi një krater të vogël në sipërfaqen hënore, por nuk paraqiti asnjë rrezik për Tokën apo për misionet aktive në Hënë.
Shkencëtarët theksojnë se ngjarja nuk ishte e papritur, pasi trajektorja e raketës ishte llogaritur prej muajsh.
Megjithatë, vendi i saktë i përplasjes dhe përmasat e kraterit do të konfirmohen nga misionet orbitale që monitorojnë sipërfaqen e Hënës.
Ekspertët vlerësojnë se ky incident rikthen në vëmendje nevojën për menaxhimin më të mirë të mbetjeve hapësinore.
Me shtimin e misioneve drejt Hënës, shmangia e përplasjeve të pakontrolluara pritet të bëhet një nga sfidat kryesore për agjencitë hapësinore dhe kompanitë private.
