Prishtinë, 01 tetor, Zhurnal.mk – Kreu i diplomacisë kosovare, Glauk Konjufca, ka marrë pjesë në një takim të vendeve të Ballkanit Perëndimor në kuadër të Procesit të Berlinit. Të pranishëm kanë qenë edhe kryediplomati gjerman, Johann Wadephul dhe komisionerja për Zgjerim e BE-së, Marta Kos.
Konjufca ka thënë se bashkëpunimi rajonal duhet të garantojë trajtim të barabartë për të gjitha shtetet.
“Bashkëpunimi rajonal duhet të garantojë trajtim të barabartë për të gjithë partnerët e WB6, të përmbushë çdo angazhim dhe të mbrojë të drejtat e çdo komuniteti. I njëjti standard duhet të zbatohet edhe për shqiptarët në Luginën e Preshevës, të cilët vazhdojnë të përballen me pasivizimin, pengesat për njohjen e diplomave dhe nën-përfaqësimin në institucionet shtetërore. Nuk mund të ketë standarde të dyfishta”, ka shkruar Konjufca.
“Republika e Kosovës është gati të përparojë në një rrugë evropiane të bazuar në meritë, me progresin e gjykuar nga rezultatet. Progresi që kemi bërë tani duhet të reflektohet në lëvizje konkrete drejt statusit të kandidatit dhe hapjes së negociatave të pranimit”, ka shtuar Konjufca.
