Tiranë, 29 prill Zhurnal.mk – Në raportin e saj vjetor Banka Botërore thekson se ekonomia shqiptare po tregon qëndrueshmëri por duhet të fokusohet tek përshpejtimi i reformave. Për vitin 2026, rritja do të jetë 3.4% ndërsa në 2027 rritja pritet të shkojë në 3.7%, por ky parashikim mund të ulet nëse lufta në Iran vazhdon.
“Për shkak të konfliktit në Lindjen e Mesme, ne kemi rishikuar rritjen ekonomike për Shqipërinë. Ne presim rritje ekonomike 3.4% dhe është 0.5% më pak se parashikimet që kishin bërë në vjeshtë. E lidhur kjo me çmimin e energjisë dhe ka për të pasur efekt edhe te konsumi, por rritja mund të jetë edhe më e ulët nëse konflikti zgjat dhe pasiguria po ashtu”, u shpreh Angelina Montfaucon, Prezantuese e raportit.
Për të përballuar këtë situatë, menaxheri I Bankës Botërore në Shqipëri Masimiliano Paolucci rekomandon fokusimin tek kapitali njerëzor me qëllim rritjen e produktivitetit.
“Ekonomia e Shqipërisë vijon të tregojë qëndrueshmëri, por ruajtja e këtij momenti kërkon reforma të guximshme strukturore. Rruga përpara është e qartë: përshpejtimi i reformave drejt anëtarësimit në BE, më shumë investime në kapitalin njerëzor dhe infrastrukturën digjitale, si dhe mobilizimi i kapitalit privat do të nxisë investimet, krijojë vende pune dhe përshpejtojë konvergjencën me BE-në”, tha ajo.
Në raport theksohet se turizmi mbetet një kontribuues i rëndësishëm në rritje, duke forcuar performancën ekonomike përgjatë viteve të fundit, por duke pasur parasysh brishtësinë ndaj goditjeve të jashtme, është më se i nevojshëm diversifikimi i ekonomisë shqiptare.
