Shkup, 26 tetor, Zhurnal.mk – Zëvendëskryeministri i parë dhe ministri për Çështje Evropiane, Bekim Sali, zhvilloi takim me ambasadoren e sapoemëruar të Republikës Çeke në Maqedoninë e Veriut, E.S. znj. Irena Getcova.
Ministri Sali i uroi ambasadores mirëseardhje dhe suksese në misionin e saj diplomatik, duke shprehur gatishmërinë për avancimin e marrëdhënieve miqësore dhe bashkëpunimit ndërmjet dy vendeve.
Në takim u diskutua për marrëdhëniet bilaterale dhe perspektivën evropiane të Maqedonisë së Veriut. Sali shprehu mirënjohje për mbështetjen e vazhdueshme të Çekisë për anëtarësimin e vendit në Bashkimin Evropian, duke theksuar rëndësinë e partneritetit me shtetet anëtare në zbatimin e reformave dhe forcimin e kapaciteteve institucionale.
Vëmendje iu kushtua mundësive për shkëmbimin e përvojave çeke në procesin e anëtarësimit dhe shfrytëzimin e fondeve evropiane, si dhe potencialit për zgjerimin e bashkëpunimit ekonomik, arsimor dhe kulturor.
Ministria për Çështje Evropiane mbetet e përkushtuar për thellimin e bashkëpunimit me Republikën Çeke, në funksion të avancimit të procesit të integrimit evropian dhe përfitimeve konkrete për qytetarët.
