Tiranë, 12 tetor, Zhurnal.mk – Shqipëria pritet të mbyllë nesër në Luksemburg negociatat për Kapitullin 20, “Ndërmarrjet dhe Politika Industriale”, duke shënuar një tjetër hap në procesin e anëtarësimit në Bashkimin Evropian.
Konferenca Ndërqeveritare Shqipëri-BE do të zhvillohet pas miratimit të vendimit nga përfaqësuesit e shteteve anëtare në Komitetin e Përfaqësuesve të Përhershëm (COREPER). Me këtë zhvillim, Shqipëria mbyll përkohësisht katër nga 33 kapitujt e negociatave.
Komisionerja evropiane për Zgjerimin, Marta Kos, u shpreh sot se, janë parashikuar katër konferenca ndërqeveritare me Shqipërinë, Malin e Zi, Moldavinë dhe Ukrainën, duke e cilësuar këtë si dëshmi se procesi i zgjerimit të BE-së po ecën përpara.
“Pas vendimit të shteteve anëtare, tashmë kemi perspektivën e mbajtjes së katër konferencave ndërqeveritare me Malin e Zi, Shqipërinë, Moldavinë dhe Ukrainën. Kjo do të jetë hera e tretë që nga qershori që do të zhvillohen 4 konferenca ndërqeveritare në të njëjtën kohë”, tha Kos.
Komisionerja theksoi se, “kjo është një shenjë e qartë se procesi i zgjerimit po ecën përpara. Vendet që kryesojnë këtë proces po përmbushin angazhimet e tyre dhe ne po bëjmë pjesën tonë”.
Kapitulli 20 përfshin politikat për zhvillimin e sipërmarrjes dhe industrisë, mbështetjen e ndërmarrjeve të vogla dhe të mesme, përmirësimin e klimës së investimeve dhe rritjen e konkurrueshmërisë së ekonomisë.
