Shkup, 9 prill, Zhurnal.mk – Respektim të plotë të kornizës ligjore në fuqi dhe standardeve ndërkombëtare. Kjo është përgjigja e zyrës së delegacionit të BE-së në Shkup, në pyetjen e gazetës KOHA se si e komenton kjo zyre protestën e së hënës të studentëve shqiptarë për mungesën e gjuhës shqipe në provimin e Jurisprudencës.
“Bashkimi Evropian është i themeluar mbi vlerat e lirisë, demokracisë dhe respektimit të të drejtave themelore të njeriut dhe është i përkushtuar ndaj respektimit të të drejtave themelore për lirinë e shprehjes dhe tubimit. Protestat paqësore janë një mjet legjitim për shprehjen e qëndrimeve dhe angazhimin qytetar në shoqëri. Këto të drejta janë gjithashtu të garantuara në legjislacionin kombëtar të Maqedonisë së Veriut,“ tha delegacioni i BE-së, reporton koha.mk.
“Sa i përket çështjes së provimit të Jurisprudencës në gjuhën shqipe, është e rëndësishme që kjo të diskutohet përmes një dialogu gjithëpërfshirës me ekspertë dhe praktikuesë, për të arritur një konsensus të gjerë që siguron respektimin e plotë të kornizës ligjore në fuqi dhe standardeve ndërkombëtare”, thuhet në përgjigjen e zyrës së BE-së në Shkup për koha.mk.
