Komentet e fundit të presidentit Donald Trump në lidhje me lejimin e qindra mijëra studentëve ndërkombëtarë kinezë në Shtetet e Bashkuara kanë tërhequr kritika nga disa prej anëtarëve më të zëshëm të Partisë Republikane.
Përpara takimit të tij me presidentin e Koresë së Jugut, Lee Jae-myung në Shtëpinë e Bardhë të hënën, Trump u tha gazetarëve se planifikon të lejojë 600,000 studentë kinezë në vend – një shifër më shumë se dyfishi i numrit në Shtetet e Bashkuara tani.
“Do të shkojmë mirë me Kinën. Dëgjoj kaq shumë histori rreth ‘Nuk do t’i lejojmë studentët e tyre’” të hyjnë, tha Trump. “Do të lejojmë, është shumë e rëndësishme, 600,000 studentë. Është shumë e rëndësishme”.
Dhe ky po vlerësohet si një ndryshim i madh nga një njoftim që Sekretari i Shtetit, Marco Rubio bëri në maj, kur premtoi se Shtetet e Bashkuara do të “revokonin në mënyrë agresive” vizat për studentët kinezë dhe do të shtonin më shumë kontroll mbi të gjitha aplikimet e ardhshme për viza nga Kina.
Ndërsa Trump theksoi marrëdhënien “e rëndësishme” të Shteteve të Bashkuara me vendin, anëtarë të tjerë të profilit të lartë të partisë së tij nuk ishin dakord.
Përfaqësuesja Marjorie Taylor Greene, R-Ga., kundërshtoi idenë në mediat sociale.
“Pse po lejojmë që 600,000 studentë nga Kina të zëvendësojnë mundësitë e studentëve tanë amerikanë?” shkroi Greene në X. “Ne kurrë nuk duhet ta lejojmë këtë”.
E influencuesja e ekstremit të djathtë dhe kandidatja republikane për në kongres dy herë Laura Loomer gjithashtu e kritikoi idenë, duke i etiketuar studentët kinezë si “spiunë komunistë”.