Shkup, 24 nëntor – Zgjedhjet kanë bllokuar pagesën e ndihmës shtetërore për kompanitë e huaja. Sipas drejtuesve të ndërmarrjeve të huaja që operojnë në vend, kjo është hera e parë që pagesat vonohen dhe, siç thonë ata, kjo nuk është shenjë e mirë, raporton Telma.
Drejtori ekzekutiv i ODW Electric, Ognen Cjubalevski, thotë se edhe më herët ka pasur zgjedhje, por pagesat nuk janë vonuar.
“Këtë vit për herë të parë kemi devijim për shkak të zgjedhjeve. Ndihma shtetërore ende nuk është paguar. Dymbëdhjetë vjet me radhë është paguar në kohë dhe kanë pasur nuk e di sa zgjedhje, por asnjëherë nuk ka pasur vonesë. Këtë vit për herë të parë nuk po paguhet me arsyetimin se kjo lidhet me zgjedhjet lokale. Dhe kjo është diçka që mendoj se nuk i duhet Maqedonisë,” theksoi Cjubalevski.
Ndërkohë, kriza në industrinë automobilistike në Gjermani po ndihet edhe këtu. Meqenëse tregu atje po stagnon, po hapet mundësi për hyrjen e automjeteve kineze – të cilat, megjithatë, nuk janë partnere të investitorëve që operojnë në Maqedoninë e Veriut.
Sipas Viktor Mizo, kryetar i Këshillit të Investimeve të Huaja, rol të madh në këto zhvillime kanë doganat amerikane.
“Dogana të vendosura nga Trump, kryesisht për prodhuesit premium të automjeteve në Evropë, të cilëve tregjet më të mëdha u janë në SHBA, ato 15% doganë shtesë ndikon në shitjet e Mercedesit, BMW-së dhe Range Rover-it, ndërsa ne prodhojmë pjesë për këto kompani. Nëse i shikoni të dhënat e fundit për fitueshmërinë e këtyre kompanive, do të shihni se fitimi i Porsche për nëntë muaj të këtij viti është ulur mbi 95% krahasuar me vitin e kaluar. Diçka e ngjashme po ndodh me Mercedesin dhe Volkswagenin,” tha Mizo.
Për shkak të këtyre problemeve, kompanitë Aptiv dhe Dura po shqyrtojnë mbylljen e fabrikave të tyre në zonën industriale të Shkupit. Të tjera kanë reduktuar numrin e të punësuarve, ndërsa disa janë detyruar të anullojnë turnet e punës.
Sipas të dhënave të fundit të Bankës Popullore, vitin e kaluar në dy tremujorët e parë, investimet e huaja kapnin rreth 560 milionë euro. Ndërsa këtë vit, në të njëjtën periudhë, ato janë përgjysmuar – duke rënë në pak mbi 220 milionë euro. (INA)
