Shkup, 06 maj, Zhurnal.mk – Zëvendëskryeministri i Parë dhe Ministri për Çështje Evropiane, Bekim Sali, theksoi se integrimi evropian mbetet prioritet strategjik i vendit, gjatë një aktiviteti të organizuar me rastin e 30-vjetorit të marrëdhënieve mes Maqedonia e Veriut dhe Bashkimi Evropian.
Në këtë ngjarje, ku i pranishëm ishte edhe ambasadori i BE-së në vend, Michalis Rokas, Sali nënvizoi se pas përfundimit të procesit të screening-ut, institucionet janë të përqendruara në përshpejtimin e reformave dhe në arritjen e rezultateve konkrete.
“Tridhjetë vite partneritet dhe 25 vite nga Marrëveshja e Stabilizim-Asociimit dëshmojnë se rruga jonë evropiane është e qartë dhe e pakthyeshme. Sot, integrimi nuk është vetëm një qëllim – është proces i dorëzimit të rezultateve konkrete,” deklaroi Sali.
Ai theksoi se përmes Agjendës së Reformave dhe Planit të Rritjes, vendi tashmë po shënon përparim të matshëm në fusha kyçe si sundimi i ligjit, reforma në administratën publike dhe qeverisja ekonomike.
Sali shtoi se një proces i besueshëm i zgjerimit kërkon angazhim të ndërsjellë, si nga vendet kandidate, ashtu edhe nga vetë Bashkimi Evropian.
“Një proces i qëndrueshëm zgjerimi kërkon përkushtim të dyanshëm – reforma reale nga vendet kandidate dhe parashikueshmëri nga Bashkimi Evropian,” theksoi ai.
Në përmbyllje, ai ritheksoi objektivin strategjik të vendit për anëtarësim të plotë në BE.
“Ambicia jonë është e qartë – anëtarësim i plotë në Bashkimin Evropian,” u shpreh Bekim Sali.
