Presidenti amerikan, Donald Trump deklaroi se do të jetë indirekt i përfshirë në bisedimet mes Iranit dhe Shteteve të Bashkuara, të cilat pritet të nisin sot më vonë në Gjenevë, sipas BBC.
Duke folur para gazetarëve në bordin e avionit presidencial “Air Force One”, Trump tha se beson që Irani dëshiron të arrijë një marrëveshje për programin e tij bërthamor.
Raundi i dytë i bisedimeve në Zvicër vjen pas kërcënimeve të përsëritura ushtarake kundër Iranit lidhur me masat shtypëse të protestave antiqeveritare dhe mosmarrëveshjet për programin bërthamor.
Ministria e Jashtme në Teheran tha dje se qëndrimi i SHBA-së për çështjen bërthamore kishte lëvizur drejt “një qasjeje më realiste”.
Irani ka bërë të ditur se takimi i sotëm, i ndërmjetësuar nga Oman, do të fokusohet në programin e tij bërthamor dhe heqjen e mundshme të sanksioneve ekonomike të vendosura nga SHBA-ja.
Uashingtoni ka sinjalizuar më herët se dëshiron të diskutojë edhe çështje të tjera, si arsenali raketor i Iranit.
Duke i cilësuar bisedimet si “shumë të rëndësishme”, Trump sugjeroi se Teherani këtë herë është i motivuar për të negociuar.
“Nuk besoj se ata duan pasojat e mosarritjes së një marrëveshjeje”, tha ai, duke shtuar se Irani i kishte mësuar pasojat e një qëndrimi të ashpër gjatë bisedimeve verën e kaluar, kur SHBA bombardoi objektiva bërthamore iraniane.
“Mund të kishim pasur një marrëveshje në vend që të dërgonim avionët B-2 për të goditur potencialin e tyre bërthamor. Dhe ne duhej t’i dërgonim B-2”, tha Trump.
Këto deklarata vijnë mes një shtimi të pranisë ushtarake amerikane në Lindjen e Mesme javët e fundit.
Sipas imazheve satelitore aeroplanmbajtësja amerikane “USS Abraham Lincoln” ndodhet pranë Iranit.
Po ashtu, SHBA-ja raportohet se ka dërguar edhe “USS Gerald R. Ford”, anija më e madhe luftarake në botë, e cila mund të mbërrijë në rajon brenda tre javësh.
Përveç kësaj, është vërejtur rritje e pranisë së shkatërruesve, anijeve luftarake dhe avionëve luftarakë amerikanë në zonë.
