Në Maqedoninë e Veriut u regjistrua rënie e numrit të të punësuarve për 3.6 përqind në industri gjatë muajit janar, krahasuar me janarin e vitit të kaluar.
Shkup, 11 mars, Zhurnal.mk – Numri i të punësuarve në industri në Maqedonia e Veriut ka shënuar rënie prej 3.6 për qind gjatë muajit janar 2026, krahasuar me të njëjtën periudhë të vitit të kaluar, sipas të dhënave të publikuara nga Enti Shtetëror i Statistikave i Maqedonisë së Veriut, transmeton Zhurnal.mk.
Sipas raportit, numri i punëtorëve në sektorin Minierat dhe gurorët ka shënuar rënie prej 6.2 për qind në muajin janar të këtij viti krahasuar me janarin e vitit 2025. Po ashtu, rënie është regjistruar edhe në sektorin Industria përpunuese, ku numri i të punësuarve është ulur për 3.6 për qind.
Ndërkohë, rënie më e vogël është shënuar edhe në sektorin Furnizimi me energji elektrike, gaz, avull dhe ajër të kondicionuar, ku numri i të punësuarve ka rënë për 0.5 për qind.
Sipas të dhënave të statistikave, rënia më e madhe e numrit të punonjësve është regjistruar në sektorin e përpunimit të drurit, me 17.1 për qind më pak të punësuar.
Në të kundërtën, rritja më e madhe e punësimit është shënuar në sektorin e prodhimit të produkteve kompjuterike, elektronike dhe optike, ku numri i punonjësve është rritur për 11 për qind krahasuar me të njëjtën periudhë të vitit të kaluar.
