Tiranë, 11 maj, Zhurnal.mk – Kreu i partisë më të madhe opozitare në Shqipëri, Sali Berisha, e akuzoi Ambasadorin italian të BE-së në Tiranë, Silvio Gonzato, se po ia mbanë anën e Kryeministrit Edi Rama, ndërsa tensionet midis opozitës dhe qeverisë në vend vazhdojnë.
Berisha tha në një video përgjigje për mbështetësit e tij se Gonzato është “Ambasadori i Edi Ramës”.
“Për sa i përket ambasadorit aktual, unë kam shprehur, ky sillet si me qenë ambasador i Edi Ramës. Mbase, ky zotëri, në mënyrë të vërtetuar, vërtetuar, ka transmetuar në Bruksel trillimet më të pavërteta ndaj opozitës. Sikur opozita nuk është për integrimin. Për të mos treguar shumë gjëra të tjera,” tha Berisha.
Por një zëdhënës i BE-së i mohoi akuzat e tij.
“Deklarata të tilla janë të papranueshme. BE-ja dënon fuqimisht sulmet personale të bëra në Ditën e Evropës kundër Ambasadorit të Bashkimit Evropian në Shqipëri. Ambasadori i BE-së ka vepruar në çdo kohë me profesionalizëm dhe integritet të plotë. Ne kemi besim të plotë tek ai dhe puna e tij”, publikoi zyra e BE-së në Tiranë një reagim përmes X.
Berisha dhe Partia e tij Demokratike (PD) akuzojnë Ramën për korrupsion, përvetësim të fondeve shtetërore, lidhje me krimin e organizuar dhe mashtrim zgjedhor.
Partia ka mbajtur tetë protesta masive në rrugë këtë vit në Tiranë kundër Ramës duke kërkuar dorëheqjen e tij, një qeveri teknike dhe zgjedhje të parakohshme.
Vala e re e protestave vjen ndërsa Rama refuzon të heqë imunitetin e ish-Ministres së Energjisë dhe Infrastrukturës të paditur Belinda Balluku, e cila akuzohet nga prokuroria për shkelje të ligjit në lidhje me dy tendera në sektorin e ndërtimit dhe po hetohet për disa të tjerë.//Zhurnal.mk
