Uashington, 11 maj, Zhurnal.mk – Presidenti amerikan Donald Trump ka kritikuar ashpër përgjigjen e Iranit ndaj një propozimi të SHBA-së që synon përfundimin e luftës, duke e cilësuar atë si ”plotësisht të papranueshme”.
”Sapo lexova përgjigjen nga të ashtuquajturit ‘përfaqësues’ të Iranit. Nuk më pëlqen, plotësisht e papranueshme. Faleminderit për vëmendjen ndaj kësaj çështjeje”, shkroi ai në platformën e tij Truth Social
Presidenti Trump nuk dha detaje të tjera mbi përmbajtjen e propozimit.
Disa orë më herët, në një postim tjetër, ai paralajmëroi gjithashtu Teheranin duke shkruar ”Ata nuk do të qeshin më!”.
Sipas agjencisë shtetërore iraniane IRNA, Irani ia kishte dorëzuar përgjigjen e tij propozimit amerikan Pakistanit, i cili po vepron si ndërmjetës.
Transmetuesi shtetëror iranian IRIB raportoi se drafti iranian fokusohet në përfundimin e armiqësive në të gjitha frontet, veçanërisht në Liban, si dhe në garantimin e sigurisë së transportit detar.
Qeveria iraniane ka deklaruar gjatë javës së fundit se po shqyrtonte një propozim amerikan të përbërë nga 14 pika. Plani synon krijimin e bazës për një periudhë fillestare 30-ditore negociatash për t’i dhënë fund luftës.
Sipas raportimeve të medies, diskutimet përfshijnë gjithashtu një lehtësim të mundshëm të sanksioneve amerikane dhe marrëveshje lidhur me të ardhmen e Ngushticës së Hormuzit.
Propozimi thuhet se synon gjithashtu të krijojë bazat për negociata mbi programin bërthamor të Iranit.
