Shkup, 5 qershor Zhurnal.mk – Në Maqedoninë e Veriut, gjithsej 35.950 kryefamiljarë janë përfitues të ndihmës sociale, ndërsa 76.250 persona figurojnë si shfrytëzues të mbrojtjes sociale, sipas të dhënave më të fundit të publikuara nga Enti Shtetëror i Statistikave.
Sipas raportit, gjatë vitit 2025 janë regjistruar 16.743 persona të mitur dhe 59.507 persona të rritur si përfitues të mbrojtjes sociale. Nga të miturit që marrin mbështetje sociale, 50,3 për qind janë përfshirë në shërbimet e punës sociale, ndërsa te të rriturit kjo përqindje arrin në 84,6 për qind.
Të dhënat tregojnë gjithashtu se në vend funksionojnë 40 institucione-shtëpi për persona të rritur, 125 shoqëri tregtare private për punësimin e personave me aftësi të kufizuara, një institucion për përkujdesjen e fëmijëve me probleme sociale-edukative dhe sjellje problematike, si dhe tre institucione për akomodimin e personave me pengesa trupore dhe mendore.
Po ashtu, në Maqedoninë e Veriut operojnë edhe tre institucione për strehimin dhe kujdesin e fëmijëve dhe të rinjve pa prindër ose pa përkujdesje prindërore.
Sipas statistikave zyrtare, në 40 shtëpitë për persona të rritur janë të akomoduar gjithsej 2.136 shfrytëzues, duke reflektuar nevojën e vazhdueshme për shërbime sociale dhe mbështetje institucionale për kategoritë më të ndjeshme të shoqërisë.
