Prishtinë, 11 qershor, Zhurnal.mk – Kryeministri në detyrë i Kosovës, Albin Kurti, ka shprehur ngushëllimet e tij për vdekjen e diplomatit dhe intelektualit shqiptar nga Maqedonia e Veriut, Arsim Zekolli, duke e cilësuar humbjen e tij si një humbje që tejkalon rrethin familjar dhe prek të gjithë jetën publike e shoqërore.
Në një postim në Facebook, Kurti bëri të ditur se gjatë qëndrimit në Vjenë kishte marrë lajmin për vdekjen e Zekollit, ndërsa një ditë më parë kishte vizituar familjen e tij në Bllacë të Suharekës për t’u shprehur ngushëllime.
“Isha në Vjenë kur mora lajmin e trishtë se Arsim Zekolli ka vdekur. Dje vizituam familjen e tij në Bllacë të Suharekës për ngushëllime dhe ende nuk më besohet që nuk do ta shohim e dëgjojmë më. I kam mbresat e pashlyeshme nga një njeri me dije të gjerë që mendonte e rimendonte rishtas dhe thellë teksa fliste”, ka shkruar Kurti.
Ai vlerësoi lart kontributin intelektual dhe publik të Zekollit, duke theksuar se largimi i tij lë një boshllëk të madh në shoqëri.
“Kur një punëtor i inteligjencës politike qytetare dhe i ndjeshmërisë së lartë kulturore si Arsim Zekolli largohet nga kjo botë, humbja nuk mbetet vetëm brenda familjes, miqve dhe bashkëpunëtorëve. Ajo ndihet edhe në jetën publike e shoqërore, aty ku fjala, mendimi dhe guximi lënë gjurmë”, u shpreh ai.
Sipas Kurtit, pikëllimi për ndarjen nga jeta të Zekollit do të mbetet gjatë, ndërsa vlerësoi veçanërisht mendimin kritik dhe pavarësinë e tij intelektuale.
“Do të na mungojnë tekstet e tij, sepse nuk zëvendësohen kollaj qëmtimet dhe përsiatjet e tij. Arsimi shkruante sepse mendonte dhe mendonte sepse të menduarit ishte tipari i tij kryesor. Ishte prej atyre njerëzve që mendimin nuk e përdorte për t’u rehatuar. Shqyrtimi i tij shqetësonte atë vetë dhe të tjerët. Kur shkruante, nuk e bënte për të ndjekur opinionin, por për ta sfiduar atë. Fjala e tij kishte peshën e karakterit të pavarur”, ka thënë Kurti.
Ai u ka shprehur ngushëllime familjarëve, miqve dhe bashkëpunëtorëve të Zekollit.
“Në emrin tim dhe të Qeverisë së Republikës së Kosovës, i shpreh edhe njëherë ngushëllimet më të sinqerta familjes Zekolli, miqve, kolegëve dhe të gjithë atyre që e njohën, e lexuan dhe e vlerësuan. U prehtë në paqe!”, shtoi Kurti.
