Shkup, 11 qershor Zhurnal.mk – Avokatja Ivana Jakimovska bëri të ditur se klienti i saj, Enes Demiri, i cili ishte arrestuar më 21 maj 2025 nën dyshimin për vrasjen që ndodhi pranë Plastiçarskës, është liruar nga të gjitha akuzat.
Përfaqësuesi i Prokurorisë në seancën e sotme gjyqësore e tërhoqi aktakuzën, pas provave të paraqitura nga mbrojtja.
Pas zhvillimit të një hetimi të plotë dhe profesional, organet kompetente konstatuan se ai është plotësisht i pafajshëm dhe nuk ka asnjë lidhje me veprën penale.
Gjatë procedurës u paraqitën një sërë provash në favor të Demirit. U vërtetua se në momentin e ngjarjes ai ndodhej në një vend tjetër dhe ishte duke folur në telefon me bashkëshorten e tij. Alibia e tij u konfirmua edhe nga pesë dëshmitarë, të cilët dhanë deklarata para organeve kompetente. Përveç kësaj, u siguruan edhe prova të tjera materiale që dëshmuan qartë se ai nuk kishte qenë i përfshirë në ngjarje.
Në bazë të të gjitha fakteve dhe provave të mbledhura gjatë hetimit, aktakuza ndaj Enes Demirit u tërhoq, ndërsa pafajësia e tij u vërtetua plotësisht njoftoi avokatja mbrojtëse e të akuzuarit.
