Prishtinë, 15 qershor Zhurnal.mk – Në Kosovë gjatë muajit prill të këtij viti janë regjistruar 2 mijë e 261 lindje, duke shënuar rënie prej mbi 50 lindje ose rreth 2.3 për qind krahasuar me muajin mars 2026.
Sipas të dhënave të publikuara nga Agjencia e Statistikave të Kosovës (ASK), nga numri i përgjithshëm i lindjeve të regjistruara brenda dhe jashtë vendit, 1 mijë e 183 janë meshkuj, ndërsa 1 mijë e 78 janë femra.
Gjatë së njëjtës periudhë janë regjistruar gjithsej 916 raste të vdekjeve, prej të cilave 515 meshkuj dhe 401 femra. Krahasuar me marsin 2026, numri i vdekjeve ka shënuar ulje prej 1.7 për qind.
ASK bën të ditur se në prill janë regjistruar edhe 1 mijë e 126 kurorëzime brenda dhe jashtë Kosovës. Në raport me muajin paraprak, numri i martesave është rritur për rreth 20.8 për qind.
Ndërkaq, gjatë këtij muaji janë evidentuar 111 raste të shkurorëzimeve. Krahasuar me marsin, numri i divorceve ka rënë për 16.5 për qind.
Agjencia e Statistikave thekson se këto të dhëna janë përpiluar mbi bazën e evidencave administrative, ndërsa burim i informacionit është Agjencia e Regjistrit Civil të Kosovës (ARC)./kp
