Një studim i publikuar në Journal of Relationships Research tregon se marrëdhëniet mes motrave dhe vëllezërve, veçanërisht kur janë të ndërtuara mbi besim dhe afërsi emocionale, mbeten ndër lidhjet më të forta gjatë gjithë jetës.
Sipas studiuesve, lidhja me motrën ndikon drejtpërdrejt në nivelin e bashkëpunimit dhe ul konfliktet, edhe pasi merret parasysh ndikimi i prindërve dhe miqve. Studimi thekson se motrat dhe vëllezërit mund të shërbejnë si një burim i rëndësishëm mbështetjeje emocionale edhe në moshën e rritur.
Një tjetër hulumtim, i realizuar me mbi 600 të rritur, zbuloi se çiftet motër-motër raportojnë marrëdhëniet më të ngrohta krahasuar me kombinimet e tjera të motrave dhe vëllezërve. Studiuesit vunë re gjithashtu se lidhjet e forta mes motrave shoqërohen me më pak vetmi dhe me mirëqenie më të lartë psikologjike, transmeton Klankosova.tv.
Ekspertët shpjegojnë se kjo ndodh sepse motrat shpesh mbajnë komunikim më të shpeshtë, ndajnë përvoja personale dhe ofrojnë mbështetje emocionale gjatë fazave të ndryshme të jetës, nga fëmijëria deri në pleqëri. Megjithatë, ata theksojnë se cilësia e marrëdhënies varet nga dinamika familjare, përvojat e përbashkëta dhe mënyra si është ndërtuar raporti ndër vite.
Studimet përforcojnë idenë se, kur kultivohet me besim, respekt dhe komunikim, marrëdhënia mes motrave mund të jetë një nga lidhjet më të qëndrueshme dhe më mbështetëse në jetën e një personi.
