Një pasion që e ka shoqëruar për gati nëntë dekada i ka sjellë një rekord të jashtëzakonshëm. Ivor Parker, nga Ab Kettleby në Leicestershire të Anglisë, është bërë lojtari më i moshuar profesionist i pokerit në botë, në moshën 100-vjeçare.
Parker ka nisur të luajë poker që në moshën 14-vjeçare. Dorën e tij të parë e luajti në vitin 1940, në një pub në Boston të Lincolnshire, duke grumbulluar plot 86 vite përvojë në këtë lojë, transmeton Klankosova.tv.
Gjatë gjithë jetës, ai ka ndërtuar një njohuri të thellë për pokerin dhe beson se suksesi në këtë sport varet nga durimi, qëndrueshmëria, strategjia dhe dashuria për garën.
Ndryshe nga shumë sporte të tjera, ku karriera e një sportisti është e kufizuar në disa vite, Parker thotë se pokeri është një nga disiplinat e rralla ku përvoja, qetësia dhe aftësia për të marrë vendime të zgjuara mbeten vendimtare pavarësisht moshës.
Së fundmi, ai është bërë ambasador me kohë të plotë i platformës së pokerit GGPoker, duke nisur zyrtarisht rolin e tij në një aktivitet VIP të organizuar nga Grosvenor Casinos, në prag të turneut Goliath 2026.
“E kam dashur pokerin për aq kohë sa mbaj mend. U dashurova me lojën që në fillim dhe nuk kam parë kurrë prapa,” tha Parker.
Ai shtoi se ka luajtur poker në vende të ndryshme të botës, veçanërisht gjatë periudhës së luftës.
“Çdo lojë është ndryshe, çdo tavolinë ka historinë e saj dhe gjithmonë mëson diçka të re,” u shpreh ai.
Përveç pasionit për pokerin, Parker ka pasur edhe një karrierë të gjatë pune. Ai ka punuar si operator prodhimi në kompaninë East Midlands Farmer deri në moshën 98-vjeçare, transmeton Klankosova.tv.
Ivor Parker është martuar dy herë dhe është babai i pesë fëmijëve, ndërsa sot vazhdon të dëshmojë se mosha nuk është pengesë për të ndjekur pasionin dhe për të arritur suksese të reja.
