Shkup, 6 gusht, Zhurnal.mk – Zëvendësministri i Shëndetësisë, Jovica Andovski, zhvilloi takim pune me përfaqësues të Shoqatës HEMA‑ONKO – shoqatë e dedikuar pacientëve me kancer dhe kujdestarëve të tyre, si dhe me përfaqësuese të grupit Piperutkat, ku u diskutua për nevojat aktuale të pacientëve dhe për përmirësimin e mbrojtjes shëndetësore.
Në fokus të takimit ishte Ligji i ri për barnat, ku përfaqësuesit e shoqatës paraqitën rekomandimet dhe propozimet e tyre. Zëvendësministri theksoi se organizatat e pacientëve duhet të jenë të përfshira aktivisht në krijimin e politikave dhe zgjidhjeve ligjore që i prekin drejtpërdrejt pacientët.
Bashkëbiseduesit diskutuan edhe për mundësitë e thellimit të bashkëpunimit me Zyrën e Organizatës Botërore të Shëndetësisë, me qëllim zbatimin e përvojave ndërkombëtare dhe praktikave të mira, përmirësimin e planifikimit dhe ndërtimin e një sistemi shëndetësor më efikas dhe më të qëndrueshëm.
Në takim u shqyrtua edhe gjendja me terapinë onkologjike, si dhe masat që po ndërmerren për tejkalimin e sfidave shumëvjeçare me të cilat përballen pacientët. U theksua se është siguruar rritje rekord e buxhetit për onkologjinë dhe se po punohet për përmirësimin e qasjes dhe vazhdimësisë së terapisë.
Për barnat te të cilat u regjistruan vonesa, tashmë janë ndërmarrë masa konkrete. Një pjesë e furnizimeve janë realizuar, për një pjesë janë nënshkruar kontrata të reja, ndërsa për të tjerat po sigurohen zgjidhje të përkohshme deri në normalizimin e plotë të situatës.
Gjithashtu u diskutua për diagnostikimin e hershëm, informimin më të mirë të pacientëve, thjeshtimin e procedurave administrative dhe sfidat e tjera në realizimin e të drejtave nga mbrojtja shëndetësore.
Zëvendësministri theksoi se Ministria e Shëndetësisë mbetet e hapur për bashkëpunim të rregullt, thelbësor dhe transparent me HEMA‑ONKO, grupin Piperutkat dhe të gjitha organizatat e pacientëve.
“Pacientët dhe përfaqësuesit e tyre janë partnerët tanë në krijimin e një sistemi shëndetësor më të mirë. Përmes dialogut të hapur dhe punës së përbashkët do të vazhdojmë të krijojmë zgjidhje sistemike dhe të qëndrueshme, në të cilat pacienti do të jetë në qendër të çdo vendimi”, theksoi zëvendësministri Andovski.
