Shkup, 11 shtator, Zhurnal.mk – LSDM sot në Kuvend do të dorëzojë propozim‑ligj për rritjen e pagës minimale, njoftoi kryetari i partisë Venko Filipçe, duke vlerësuar se të ardhurat aktuale nuk janë të mjaftueshme për jetë të denjë në kushte të rritjes së çmimeve.
“Në këtë moment paga minimale është 26 mijë denarë. Ne mendojmë se në këtë situatë krize, me çmim të madh të derivateve, praktikisht mbi 100 denarë për litër, kjo pagë minimale është absolutisht e pamjaftueshme për një jetë të mirë, cilësore dhe të denjë për punëtorët”, deklaroi Filipçe.
Ai theksoi se shtrenjtimi i derivateve ka tërhequr rritje edhe të çmimeve të produkteve të tjera, sidomos të ushqimit, dhe me këtë është rritur edhe vlera e shportës sindikale të konsumit. Sipas tij, mbi 70 për qind e punëtorëve në vend kanë të ardhura mes pagës minimale dhe asaj mesatare.
Filipçe kërkoi nga Qeveria të gjejë mjete për mbështetje të punëtorëve dhe kompanive, duke përmendur masat që i kishin ndërmarrë qeveritë e udhëhequra nga LSDM gjatë krizës së kovidit.
“Pagat dhe pensionet rriteshin vazhdimisht dhe kishte mbështetje për ekonominë prej mbi dy miliardë euro. Le të gjejë pushteti mënyrë. Kur mund të luksurohet dhe të shpenzojë paratë e qytetarëve pa llogari dhe pa transparencë, atëherë duhet të gjejë mënyrë edhe për njerëzit që nuk mund ta përballojnë muajin”, tha Filipçe.
Ai sërish e kritikoi Qeverinë edhe për shpenzimet për festimin e 35 vjetëve të pavarësisë, duke akuzuar kryeministrin Hristijan Mickoski se e ka futur publikun në mashtrim me pretendimin se për ngjarjet nuk janë shpenzuar para të popullit.
