Tre prej figurave më të fuqishme dhe njëkohësisht rivale të industrisë së Inteligjencës Artificiale po gjejnë një pikë të pazakontë dakordësie: zhvillimi i teknologjisë mund të jetë duke ecur tepër shpejt.
Sam Altman, drejtuesi i OpenAI, dhe Elon Musk kanë mbështetur publikisht thirrjen e Dario Amodei-t, drejtuesit të Anthropic, për të ngadalësuar ritmin e zhvillimit të sistemeve më të avancuara të Inteligjencës Artificiale.
Konsensusi i rrallë vjen pas një jave me paralajmërime të forta mbi sigurinë e AI-së dhe rrezikun që aftësitë e sistemeve të avancuara të zhvillohen më shpejt sesa mekanizmat njerëzorë për t’i kontrolluar ato.
Në një ese të publikuar të shtunën, Amodei argumentoi se industria teknologjike “duhet të ngadalësojë ritmin me të cilin përmirësojmë aftësitë e modeleve të AI-së”, duke thënë se shpejtësia e zhvillimit ishte rritur “në mënyrë drastike” gjatë verës.
Thirrja mori menjëherë mbështetjen e dy prej rivalëve të tij më të mëdhenj.
“Dario ka të drejtë”, shkroi Musk në X, duke shpërndarë esenë e Amodei-t.
Altman gjithashtu doli në mbështetje të propozimit.
“Jam dakord me Dario-n se duhet të kontrollojmë ritmin në frontier”, shkroi ai, duke iu referuar kufirit më të avancuar të zhvillimit të modeleve të Inteligjencës Artificiale.
Altman mbështeti veçanërisht një nga propozimet e Amodei-t: kompanitë që zhvillojnë modelet më të fuqishme të AI-së t’u japin ekspertëve të pavarur akses të vazhdueshëm për vlerësimin e sistemeve të tyre.
“Angazhimi për t’u dhënë vlerësuesve të pavarur akses të ngjashëm me atë të punonjësve është një ide e shkëlqyer dhe ne do të bëjmë të njëjtën gjë”, deklaroi Altman.
Mbështetja reciproke është e pazakontë për një industri të karakterizuar nga konkurrencë e fortë tregtare dhe rivalitete personale.
OpenAI dhe Anthropic janë ndër laboratorët kryesorë në garën për modelet më të avancuara të Inteligjencës Artificiale, ndërsa Musk drejton xAI dhe prej vitesh ka një marrëdhënie konfliktuale me Altman dhe OpenAI.
Por shqetësimet mbi drejtimin që mund të marrë teknologjia duket se po krijojnë një terren të përbashkët.
Alarmi nga brenda industrisë
Debati u intensifikua gjatë javës pas largimit nga Anthropic të studiuesit Jacob Coxon, i cili paralajmëroi se kompanitë po garojnë për të ndërtuar sisteme superinteligjente që potencialisht mund të përmirësojnë veten më shpejt sesa mund të ecë mbikëqyrja njerëzore.
Coxon përdori një formulim veçanërisht dramatik, duke argumentuar se kompanitë po “luajnë kumar me jetët tona”.
Paralajmërimi i tij erdhi në një moment kur industria po diskuton gjithashtu një incident gjatë testimit të agjentëve të OpenAI.
Sipas raportimit të Financial Times, një grup agjentësh të AI-së doli jashtë kufijve të sistemit të testimit dhe depërtoi në platformën për zhvilluesit e AI-së Hugging Face, duke marrë kontrollin e serverëve dhe duke koordinuar veprimet mes tyre në përpjekje për të realizuar detyrën që u ishte caktuar.
Incidenti ndodhi në një mjedis testimi, por Amodei e konsideron atë një sinjal serioz paralajmërues.
Sipas tij, një sistem me aftësi më të mëdha dhe me probleme të ngjashme të përafrimit me qëllimet njerëzore mund të kishte shkaktuar dëme shumë më serioze.
Amodei pranoi gjithashtu se incidente të ngjashme, megjithëse më pak të rënda, kanë ndodhur edhe në kompani të tjera të industrisë, përfshirë Anthropic.
Pikërisht për këtë arsye, ai argumenton se çdo kompani që zhvillon modele në kufirin më të avancuar të AI-së duhet ta trajtojë sigurinë sikur një incident i tillë të kishte ndodhur brenda sistemeve të saj.
Të ngadalësohet gara, jo të ndalet
Propozimi i Amodei-t nuk është një thirrje për ndalimin e zhvillimit të Inteligjencës Artificiale.
Ai kërkon që kompanitë të koordinojnë ritmin e zhvillimit, të forcojnë testimin e sistemeve dhe t’u japin vlerësuesve të pavarur mundësi shumë më të mëdha për të kontrolluar modelet përpara dhe gjatë përdorimit të tyre.
Një koordinim i tillë, sipas tij, kërkon edhe përfshirjen e qeverive.
Amodei argumenton se vendet demokratike duhet të krijojnë një kuadër që u lejon kompanive të AI-së të bashkëpunojnë për standardet dhe kufijtë e sigurisë pa rrezikuar që një koordinim i tillë të konsiderohet shkelje e rregullave të konkurrencës.
Ai shkon edhe më tej, duke propozuar një formë koordinimi ndërkombëtar edhe me qeveritë autoritare.
Kjo çështje bëhet veçanërisht e ndërlikuar për shkak të garës teknologjike mes Shteteve të Bashkuara dhe Kinës.
Kompanitë kineze të AI-së kanë ngushtuar diferencën me rivalët amerikanë, duke e kthyer çdo propozim për ngadalësimin e zhvillimit edhe në një çështje të konkurrencës gjeopolitike.
