Shkup, 15 shtator, Zhurnal.mk – Qytetarët që e kanë arritur kufirin e moshës për pensionim, por nuk kanë mjaftueshëm stazh pune, do të mund të blejnë maksimum 24 muaj stazh për ta plotësuar kushtin prej 15 viteve të nevojshme për pension.
Masa do të vlejë për persona që tashmë nuk janë të siguruar, kanë mbushur 62 vjeç nëse janë gra, respektivisht 64 vjeç nëse janë burra, dhe kanë të paktën 13 vite stazh pune të realizuar.
„Maksimumi është 24 muaj deri në 15 vite, respektivisht minimum duhet të kenë 13 vite stazh. Do të mund ta blejnë stazhin e tyre, pra të paguajnë për të njëjtin“, thuhet në arsyetimin e vendimit që ende është në procedurë qeveritare.
Kontributet për muajt që do të blihen, sipas vendimit të paralajmëruar, do të llogariten mbi bazë prej 50 përqind të pagës mesatare të vitit të kaluar.
Për një person që do ta përdorë të drejtën në vitin 2026, kjo do të thotë se baza për llogaritjen do të jetë gjysma e pagës mesatare në vitin 2025, dhe mbi atë shumë do të duhet të paguhen kontributet për çdo muaj që mungon.
Nëse merret parasysh se vitin e kaluar paga mesatare ishte diçka mbi 45.000 denarë, kontributet për pension ishin rreth 12.800 denarë në muaj. Gjysma e kësaj shume është rreth 6.400 denarë për çdo muaj ose diçka mbi 100 euro. Kjo do të thotë se një vit stazh do të kushtonte rreth 1200 euro.
