Shkup, 16 shtator, Zhurnal.mk – Koalicioni VLEN e ka cilësuar si të padrejtë dhe të papranueshme vendimin e sotëm të Dhomave Speciale të Kosovës në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit, duke theksuar se beteja ligjore do të vazhdojë në shkallën e Apelit.
“Me keqardhje të thellë dhe indinjatë e pranuam lajmin për vendimin ndaj Thaçit, Veselit, Krasniqit dhe Selimit. Dënimet e shqiptuara janë të larta dhe të papranueshme”, thuhet në reagimin e VLEN.
Nga koalicioni theksojnë se vendimi nuk e vë në pikëpyetje legjitimitetin e Ushtrisë Çlirimtare të Kosovës, duke rikujtuar se lufta e saj ishte një betejë e drejtë për liri, e zhvilluar në kushte represioni dhe krimesh të regjimit të Sllobodan Millosheviqit.
“E vërteta historike nuk mund të ndryshohet nga asnjë vendim gjyqësor. Lufta e UÇK‑së ishte luftë për liri”, theksohet në reagim.
VLEN rikujton se bëhet fjalë për një vendim të shkallës së parë dhe shpreh pritshmëri që në Apel të shqyrtohen argumentet e mbrojtjes.
“VLEN qëndron pranë familjeve të Thaçit, Veselit, Krasniqit dhe Selimit, pranë bashkëluftëtarëve të tyre dhe pranë popullit të Kosovës. E vërteta nuk rishkruhet”, përfundon reagimi i koalicionit.
Më herët gjatë ditës, Gjykata shpalli fajtor ish‑presidentin e Kosovës Hashim Thaçi për krime lufte dhe e dënoi me 25 vite burg. Jakup Krasniqi u dënua me 25 vite, Kadri Veseli me 18, ndërsa Rexhep Selimi me 13 vite burg. Katër ish‑krerët e UÇK‑së u shpallën përgjegjës për privim arbitrar të lirisë, trajtim mizor, torturë dhe vrasje të paligjshme, ndërsa gjykata konstatoi se nuk u provua akuzimi për krime kundër njerëzimit.
