Shkup, 18 shtator, Zhurnal.mk – VMRO‑DPMNE reagoi ndaj paraqitjes së mbrëmshme të liderit të LSDM, Venko Filipçe, në emisionin “Vetëm intervistë” në Kanal 5, duke e akuzuar se me deklaratat e tij e ka nënçmuar arsimin në vend dhe e ka vënë në pikëpyetje dijen e studentëve maqedonas.
“Çiraku i Zaevit, Venko Filipçe, duke dashur ta nënçmojë arsimin në shtet dhe të tregojë se studentët tanë janë shumë më të dobët se të huajt, pranoi se nxënësit e tij, pra mjekët e ardhshëm, kanë njohuri katastrofale”, thuhet në reagimin e VMRO‑DPMNE.
Nga partia thonë se me këtë Filipçe ka konfirmuar se si profesor nuk arrin t’ua përcjellë studentëve dijen e nevojshme.
Në reagim shtrohet edhe pyetja për angazhimin e tij si profesor, ku VMRO‑DPMNE thotë se pret që ndryshimet e reja në Ligjin për arsimin e lartë ta ruajnë statusin e tij si profesor.
Partia drejton kritika edhe për punën e tij në sektorin shëndetësor, duke përmendur një sërë akuzash për vaksinat, prokurimet publike dhe spitalet modulare.
VMRO‑DPMNE, njëkohësisht, e krahason Filipçen me kryeministrin dhe profesorin Hristijan Mickoski, për të cilin thonë se ka marrë mirënjohje nga studentët dhe është ndër profesorët e respektuar në profesionin e tij.
