Prishtinë, 24 shtator, Zhurnal.mk – Kryeministri i Kosovës, Albin Kurti, ka kërkuar që Bashkimi Evropian t’i japë Kosovës statusin e vendit kandidat për anëtarësim, duke thënë se një vendim i tillë do të ishte përgjigje ndaj orientimit euroatlantik dhe përkushtimit të Kosovës ndaj vlerave demokratike.
Kurti përmes një postimi në profilin e tij në rrjetin social Facebook, bëri të ditur se një ditë më parë, në Nju Jork, mori pjesë në një drekë të organizuar nga Përfaqësuesja e Lartë e BE-së për Politikë të Jashtme dhe Siguri dhe Zëvendëspresidentja e Komisionit Evropian, Kaja Kallas, ku ishin të pranishëm liderë të Ballkanit Perëndimor.
Sipas Kurtit, Kosova e meriton statusin e vendit kandidat dhe se një vendim i tillë do të shërbente edhe si nxitje për reforma dhe zhvillim të mëtejshëm.
Ai rikujtoi se Kosova e ka dorëzuar aplikimin për anëtarësim në BE në dhjetor të vitit 2022, në Pragë, ndërsa kritikoi vonesën në trajtimin e tij.
“Mbajtja në sirtar e aplikimit të dorëzuar në dhjetor të vitit 2022 në Pragë, përderisa jemi tërësisht të linjëzuar me politikën e jashtme dhe të sigurisë të BE-së dhe kemi shënuar përparim të rëndësishëm në pothuaj tërë fushat, përveçse padrejtësi ndaj Republikës së Kosovës do të ishte inkurajim i akterëve destabilizues rajonal dhe më gjerë”, ka deklaruar Kurti.
Kryeministri kosovar e lidhi procesin e integrimit evropian edhe me raportet me Serbinë. Ai tha se Kosova “nuk duhet dhe nuk mund të mbetet peng” i Serbisë, duke e akuzuar këtë të fundit për mbrojtjen e personave të dënuar ose të akuzuar për krime të rënda gjatë luftërave në ish-Jugosllavi.
Kurti kritikoi gjithashtu qëndrimin e Serbisë lidhur me zbardhjen e fatit të personave të zhdukur me dhunë gjatë luftës në Kosovë, si dhe për situatën e shqiptarëve në Luginën e Preshevës.
Deklaratat e Kurtit vijnë në kuadër të përpjekjeve të Kosovës për avancimin e procesit të integrimit në Bashkimin Evropian dhe trajtimin e aplikimit të saj për statusin e vendit kandidat.
