Rreth 15 të mitur rrahin brutalisht 13-vjeçarin me sende të forta

Shkup, 19 tetor Zhurnal.mk – Një rast i rëndë i dhunës mes të miturve ka tronditur lagjen Vllae të Shkupit, ku një 13-vjeçar dyshohet se është sulmuar nga një grup prej rreth 15 të miturish, duke pësuar lëndime serioze, përfshirë thyerjen e dhëmbëve.

Sipas raportimeve të portalit Skopje1, sulmi ka ndodhur rreth orës 00:30, në sheshin “Delfina”, ndërsa dëshmitarët pretendojnë se ndaj fëmijës janë përdorur edhe sende metalike.

Nëna e viktimës, 39 vjeçe, e ka denoncuar rastin në polici më 18 tetor, në orën 15:30.

MPB-ja konfirmoi sulmin dhe përdorimin e një sendi të fortë, por nuk specifikoi numrin e sulmuesve apo shkallën e lëndimeve.

Policia po ndërmerr masa për zbardhjen e rastit dhe identifikimin e personave të përfshirë.