Kthjellime dhe alternime vranësirash, pasdite nisin reshjet e shiut

Tiranë, 10 nëntor, Zhurnal.mk – Shërbimi Meteorologjik Ushtarak bëri të ditur se vendi ynë ditën e martë pritet të ndikohet nga kushte atmosferike relativisht të paqëndrueshme.

Moti parashikohet me vranësira mesatare deri të dendura si dhe alternime të herëpashershme kthjellimesh, kryesisht në pjesën e parë të ditës. Duke filluar nga orët e pasdites dhe kryesisht orët e mbrëmjes pritet mot me vranësira mesatare dhe të dendura.

Në orët e mesditës nisin reshjet e shiut të herëpashershme dhe intensitet të ulët përgjatë vijës bregdetare dhe Ultësirën Perëndimore. Në orët e pasdites dhe kryesisht orët e mbrëmjes reshjet e shiut me intensitet të ulët përfshijnë të gjithë territorin. Në zonën e veriperëndimit dhe jugperëndimit reshjet me intensitet deri mesatar në formën e shtrëngatave shoqëruar me shkarkesa elektrike.

Era parashikohet të fryjë me drejtim juglindje – jugperëndim me shpejtësi mesatare 9 m/s, përgjatë vijës bregdetare dhe lugina era me shpejtësi deri në 20 m/s, shoqëruar me valëzim në dete të forcës 3-5 ballë.